بنت خالي تحبه وولد خالي طلب ايدي

[alhashimiya]

السلام عليكم ورحمه الله وبركاته
مشكلتي ان بنت خالتي قالتلي انه تحب ولد خالي وانا قلتلها احاول اساعدج انه يتقدملج
بس المصيبه انه بعد اسبوع من السالفه كلم امي انه يبا يتقدمي اني اذا وافقت راح ايكلم امه وابوه عشان يخطبوني رسمي يوم عرفت امي بالسالفه واني رافضه عشانها قالتلي ان هذ مب سبب واتقول حرام اتضيعين حياتج عشان ها بس انا ما احب الاهل يزعلون ومااحب اخسر اهلي امي اتقول انه وايد طيب انا ادري بس وايد افكر في بنت خالتي ويالسه اطلع الف سبب وسبب عشن ارفضه وهي كله من ناحيه الشكل
اخاف استخير ويكون قبول افكر في مشاعر بنت خالتي ورده فعله اقول ياخذ غيري وما اكون انا السبب وخاصه انه صاحبه مرض

[Dubai Baby]

والله يا غناتي الظاهر انه هو اصلا ما يباها و لا داخله مزاجه و الا جان خطبها

و انتي لا تضيعين على عمرج ريل يمكن يسعدج في حياتج..

يعني تخيلي الحين ترفضينه عشان خاطر بنت خالج....و اخر شي لا هو ياخذها..و انتي تتوهقين في ريال مب زين و تتلعوزين وياه و الا بسم الله عليج تعنسين في بيت هلج..تتخيلين كيف ندمج بيكون هاييج الساعه؟؟

تدرين السكان المواطنين في دولة الامارات ان مقابل الرجل الواحد ثلاث حريم؟؟

فاقولج يا حبيبتي لا تخسرين عمرج عريس يمكن يسعدج في حياتج و يهنيج..ترا وايد بنات مب محصلات و ميلسات في بيوت هلهن

انا اقولج صلي استخاره و الله بيسر الامور

[جنوبيه 200]

عليكم السلام ورحمه الله وبركاته

حبيبتي اللي اعرفه ان الحب مو كل شي في الزواج يعني هو اكيد انه ماخطبك الا ولقى اشياء هو يبيها فيك ولا لقاها فيها


انت صلي الله واستخيري واذا الرجال طيب ويمدحون فيه لاتضيعين حياتك


الله يوفقك ويكتب لك اللي فيه الخير

اختك المحبه

[sadwoman]

اختي ما اقول الا كثر الله من امثالج
انتي صج وفيه، في زمانا هذا كل الناس همها مصلحتها وسعادتها بس
بس اختي انصحج من قلبي ان تقولين لأخت ولد خالك يعني احت اللي خاطبك عن الموضوع ان بنت خالك تحب اخوها،
صدقيني اكيد هي كتمت حبها واستحت تقول له
وشبابنا الله يهديهم آخر من يعلم
اذا لقيتي صعوبه تقولين لأخته او ما عنده اخت
ما دري اذا صح او غلط بس كلميه هو بصراحه وقولي له اللي اعرفه بصراحه ان فلا نه تحبك، يمكن يلتفت لها
سامحيني ولا تزعلي مني، بس بما ان هي فتحت قلبها وبغتك وسيطه فكوني قد الثقه
اذا قال الولد ما يبي بنت خالك
استخيري الله
بهذي الطريقه سويتي اللي المفروض تسوينه
لأنه لو ما بينتي للخاطب عن محبه بنت خالك
راح تكونين ملامه لأنها وسطتج وانتي ما تحركتي
وهي راح تنصدم من خساره حبيبها وراح تعتبرها خيانه صدقيني
ارجوج اكرر لا تزعلين مني واتمنى لج الرجل اللي يسعدج بس انا اقول اللي مفروض تسوينه
وحطي في بالك راح تحصلين اجر على امانتك وصدقك
ربي يسعدك

[الحلم الهادىء]

انا اتفق مع كلام الاخوات..دبي بيبي وجنوبية..هذا نصيب والرجال جاج انتي وطلبج بالاسم..وما خطبها هي..حتى لو رحتي ووصلتي له ان البنت تحبه !! اعتقد لو يباها كان خطبها ...وبصراحه انا مانصحج ابدا انج تفتحين هالموضوع لا الحين ولا بعدين لان الرجال يمكن ينحرج فيها !!

انتي صلي استخارة وسمعي نصيحة الوالده تراها عين العقل وتوكلي على الله...اذا الرجل مايعيبة شىء..لاتفرطين فيه

ولا تحسين بالذنب ولا شىء لان هالامور نصيب..يمكن لو تقولين له عنها وانها تحبه بعد مايبيها ولا تتزوجينه ولا هي تاخذه ويضيع منكم !! خاصة اذا كان رجل ممتاز ولا يعيبة شىء !! حيببتي كون هالبنت تحبه هذا مايعني انها احق منج فيه !! اهو تقدم لج انتي يعني يبيج انتي !!

واهي لو عاقله بتتمى لج الخير وبتنسى السالفه

الله يوفقج

[شموخ البحرين]

حبيبتي استخيري واللي الله كاتبه لج بيصير

وبعدين الزواج قسمة ونصيب اذا الله كاتب انج تاخذينه راح تاخذينه واذا كان من نصيب بنت خالج راح تاخذه

والله يوفقج

[غادة اليم]

مرحبا يالغاليه
مادري يمكن يكون رايي غير
بس ليش ماتفكرين انج تفاتحين بنت خالج بالموضوع
علشان لابعدين تاخذ عنج فكره لاسمح الله
قوليلها كل السالفه ان اهو متقدملج وانج تحاولين ترفضينه
بس أمج تقول لأ وافقي
وبعدين اللي بعرفه بنت خالج صغيره ولا كبيره
يعني تحسين ان حبها حب مراهقين وطيش ولاحب وحده ناضجه
اذا مراهقه
اسمحيلي المراهقات كل يوم يحبون لهم واحد حتى لو ممثل أو مغني
مايدرون منو يحبون
ولاتفاتحين ولد خالج بالموضوع سبحان الله يمكن يصير بينكم نصيب ماتدرين
الرياييل كل يوم فاتحين عينهم على وحده مجرد لاسمح الله يصير بينكم شي
يقول ياليتني أخذت اللي تحبني
ويقعد بعدين يتحسر وحياتج تصير جحيم
لاسمح الله
ربي يوفقج ويقدم اللي فيه الخير
ومثل ماقالوا البنات استخيري وبعدين قولي حق بنت خالج
السالفه اذا اقتنعت كان بها
واذا ما اقتنعت خلي أي وحده من خواته تكلمها وتقولها ان اهو متعلق فيج ويبيج
كل واحد ياخذ نصيبه بهالدنيا
مادري هذه وجهة نظري
والسموحه اذا قلت كلمه وماعجبتج
ترى كلنا خواتج ونبي نساعدج
موفقه يالغاليه

[شما المحيربي]

بسم الله الرحمن الرحيم
السلام عليكم ورحمة الله وبركاته
الحمدلله والصلاة والسلام على رسول الله وعلى آله وصحبه أجمعين

...
...
حبوبة ما فب احسن من استخارة رب العالمين
صدقيني كل شي بيي بروحة ...
تسلمين على المجهود الطيب
..

و

مع تحياتي الطيبة
deeeeeeeeeeb

[dala3.]

حبيبتي صلي استخاره وان شاء الله خير

وبنت خالج صارحيها

وان شاء الله بتتفهم

والله يوفقج ويسعدج

[*درب المحبه*]

استخيري واذا ارتحتي له
ادعي ان الله يساعدج
وماتصير اي خلافات

وماعليج لا من بنت خالتج ولا من غيرها

ماتقدر تسوي شي
وهي اصلا بتنحرج اذا عرفت انه تقدم لج

وقولي لها انج تتمنين لها زوج احسن منه يعزها ويرزها


الله يوفقج

[همس القـلوب]

السلام عليكم ورحمة الله وبركاته



أختي الكريمة

أنا لي تعقيب على جملة قلتيها

((اخاف استخير ويكون قبول))

تخافين من الإستخارة أختي الكريمة؟؟ تخافين من رأي الله عز وجل؟

الإستخارة عزيزتي عن طريقها تاخذين رأي خالقي وخالقج وخالق كل شي، فهل تعتقدين

أن رأي الله سيكون غير صائب إذا تمت الموافقة؟؟ والعياذ بالله..

لا يعلم ما سيكون عليه الحال إلا الله عز وجل.. إن الله سبحانه وتعالى يعلم أين الخير وأين الشر لنا

إن صلاة الإستخارة لها تأثير عجيب فهي تيسر الأمور أو تعسرها.. فإن كتب الله لكِ نصيب

معه، فسترين كيف يتيسر أمر الزواج بحيث حتى بنت خالك لن تتأثر بالأمر وإن كان عكس

ذلك فلن يتم الزواج.. إستخيري الله، مرة ومرتين و3 وشوفي إيش إللي يتيسر..

وبعد الصلاة أفتحي الموضوع مع بنت خالك وأخبريها بما حصل وانتظري ردة فعلها ورأيها..




الله يوفقها ويوفقج ويتمم لكم كل الأمور على خير


و السلام عليكم ورحمة الله وبركاته

[أثيــر]

موضووووعج صعب شوي لنه فيه احراااج


بس تدرين ولد خالج لو كان يبا بنت خالتج بيخطبها مابيرده شيء لكنه يباج انتي يعني حرااام تضيعين على عمرج معرس خلوووق وزين

وبنت خالتج صارحيهاااا بالموضوع وقوليلها شو اسوي وشوفيها شو بترد عليج ( اذا كانت تحبج صدق بتتمنى لج الخير وبتقولج وافقي لنه من نصيبج وانها مالها نصيب فيه )


وطمنينا عليييييج والله ييسر امووووووووووووووووووووووو وورج ومبرووووووووووووووووووووك مقدمـــــــــــــــــــــ ا

[غرابيل]

ردي غير عن الباقي ومن معرفة من ترك شيء لله فقد كفاه
اتركيه لها احسن يوفقك الله بخير منه
حراااااااااااام ترى الحب مو كلمة تنقال هذي مشاعر تهد جباال بعد تطلع نفسها فيكم وياويلي من النفس والعين وش تسوي وحررااااااااام كسرت خاطي لو كنت مكانك مااخذته لاني احس اني كنت عارفة بسرها وبعدين زي حركة مو طيبة انها تفضفض لك انتي من دون الناس وانتي من دون الناس يطلب ايدك
اتركيه لها وصدقيني ربي يأجرك بخير منه وبعدين هو يدري عنهاااا ولا
سوري تدخلت بس كسرت خاطري مرررررررررة وانتي الله يعينك بين بنت خالتك وبين هوى نفسك

[2paradise]

رأيي نفس رأي اختي همس القلوب:clap::smile:

[2paradise]

رأيي نفس رأي اختي همس القلوب:clap::smile: