روابط قد تهمك :
فساتين العروس | تسريحات | تنظيم الاعراس | زخرفة | عالم حواء


صفحة 1 من 2 12 الأخيرةالأخيرة
النتائج 1 إلى 15 من 17

الموضوع: ساعدوني لاني ما عندي حد اكلمه غيركم.......

  1. #1
    عروس متألقة
    تاريخ التسجيل
    10/07/2003
    الدولة
    أبوظبي
    المشاركات
    214

    ساعدوني لاني ما عندي حد اكلمه غيركم.......

    السلام عليكم ورحمة الله وبركاته و الله يا بنات يمكن تقولون ان مشكلتي عادية او يمكن ما تكون مشكلة بس انا و الله نفسيتي زفن و ما عندي خوات عشان اشكيلهم غير خواتي في هذا المنتدى و مشكلتي هي بيني و بين زوجي(مالكين فقط)، ما عبرني الا اول ايام الملجة يمكن اتصل كم مكالمة و بعدين وقف. و لا يعبرني و ما احس موووووول انه يحبني و هذا اللي قاهرني و بعد اشوف قريباتي ازواجهم يتصلون فيهم و يعبروهم و ييبون لهم الهدايا و رومانسيين و انا يا حظي و لا حتى مسج. تصدقون اننا للآن مالجين تقريبا 5 شهور و هو ما اتصل فيني الا يمكن 5 مرات متفرقة و اكثرهم عشان يطلب اوراق عشان بعض الاجراءات وما تزيد المكالمة عن 6-7 دقائق!. و الله قاهرني .... قلت يمكن حرام مشغول لأن شغله شفتات و متعب وانه في الاجازات يسير عند ربعه بس اكتشفت انه وايد ييلس في البيت و يا اهله و ما يكلف نفسه يتصل و لو حتى يسلم. لكن الحق يقال انه لما سرت عند خواته لانهم عيال عمي (طبعا ما قلتلهم شي) قالولي انه دووم يمدح و ما يخلي حد يتكلم علي لكن و الله ها الكلام زعلني اكثر من انه فرحني لانه ما يقولي ها الكلام وان انسانه احتاج احس انه يحبني مثل ما احبه لين ما عصبت ودزيتله مسج بينت فيه انه زعلانه منه بسبب تصرفاته و اني ما ابي اكلمه و ما بدزله مسج و الحبيبب و لا عبر لين ما قررت اني ابدا ما بكلمه لين عرسنا اللي بيكون في لاني واايد زعلانه منه و لا تقولون يستحي زوجي ماله علاق بالحياء ابدااااا.

    ساعدوني هل انا صح و لا غلط!

  2. #2
    عروس مبدعة الصورة الرمزية toti1
    تاريخ التسجيل
    16/06/2003
    الدولة
    نص بالرياض ونص بالظهران
    المشاركات
    674
    مدري وش اقول لك!!

    اختي تقدرين تخشين بعينه وتسالينه هل فيه شي مضايقه؟؟

    او ليش هو مقصر معاك؟؟ وقولي اللي تحسين فيه

    لان هذا وهو لسه متملك اجل لو تزوجتوا ايش راح يصير!!

    احسن لك من البدايه تعرفين !لانك لاانتي مجبره عليه ولاهو مجبر عليك!!

    واهم سؤال انتم صليتوا الاستخاره قبل الملكه او لا؟؟

    اذا ماصليتوا لازم تصلونها عشان الله يختار لكم الخيره..

  3. #3
    عروس ماسية الصورة الرمزية نوووسهUAE
    تاريخ التسجيل
    03/11/2003
    الدولة
    الساحل الشرقي ..ثم الشمالي
    المشاركات
    4,983
    بعض الرجال لا يفضلوون التكلم اثناء قترة الملكه

    مدام انه مايبغي يتصل

    لا تضغطين عليه علشان يتصل فيج

    ولا تفكرين ولا تقارنين بين البنات

    كل شخص يختلف عن الثاني

    ان شاء الله تتهنين معاه بعد العرس

  4. #4
    مشرفة سابقة الصورة الرمزية المبدعة
    تاريخ التسجيل
    17/04/2002
    الدولة
    الإمارات
    المشاركات
    2,119
    حبيبتى الغاليه

    اشكرج في البداية على ثقتج الكبيرة .. انا بقولج وجهة نظري وما ادري

    في بعض الرجال لا يعرفون ابداً التعبير عن مشاعرهم .. ليس حياءاً او ما شابه ذلك .. لا ولكن ينقصهم الاسلوب او انهم يرون ان المكالمات او الرسال لا تغنى عن ذلك .. وبعض الرجال لا يعرف ان يعبر عن حبه لزوجته .. سيدافع عنها نعم ويمدحها ولكن لا يعرف ان يعبر ..

    وبعض الرجال قبل فترة القران يكونون مثل ما تقولين ( عاااااااادي لا اتصال ولا مسجات ويمكن لو حسستيه انج زعلانه بيقول في نفسه ليش تزعل؟؟ انا ما سويت شي)

    بس يالغاليه اغلب الرجال بعد الزواج والعرس ترينهم يتغيرون بحكم ان البعيدة اصبحت قريبه جداً بالنسبة له.. وسترين ذلك بنفسك
    فلا تحزنى ولا تضايقى ما دام ان خواته يقولون انه دووم يمدح و ما يخلي حد يتكلم عليج .. فهذا دليل حبه لك وإلا ما دافع عنك

    توكلى على الله .. وبادرى انت بالاتصال وطرشيله مسجات حب بس الافضل لو تكتبينها بنفسك يعنى ما تكون متداوله عسب يحس فيج اكثر وما يول انه هالمسج واصلنها وطرشته لى.. كلما كان المسج منج كان التعبير احلى وأقوى

  5. #5
    عروس مبدعة الصورة الرمزية بنت زايد
    تاريخ التسجيل
    05/05/2002
    الدولة
    Dubaiفي قلب زايد
    المشاركات
    998
    هلا حبيبتي... مب كل الرياييل نفس الشي ....
    في رياييل يحبون حريمهم بس ما يبينولهم ما عرف ليش مثل ريلي الا نادر ما يقولي كلام حلو ...

    انت رمسي ريلج واتفاهمي وياه لا تسكتين...

    واتمنالج التوفيق..

  6. #6
    عروس متألقة
    تاريخ التسجيل
    01/02/2005
    الدولة
    UAE
    المشاركات
    252
    بسم الله الرحمن الرحيم
    السلام عليكم ورحمة الله وبركاته

    مرحبا الغاليه اول شئ ما تكدرين عمرج لانه اذا خذتي هذي العاده في الزعل بتمين كل ما حصل شئ ما بينكم بتزعلين حتى لو كان تافه و ثاني شئ بغيت اقولج انه في رياييل وايد مثل ريلج في هذا الطبع يعني ما يعرفون شو يقولون حق حريمهم لان بطبعهم جي يعني يبالهم فتره الين ما يتعودن على حريمهم و و صدقيني انتي لازم تتصلين فيه وتسالين عنه عشان تحسسينه باهتماج و خوفج عليه و دائما يوم بتخلصين كلامج وياه قوليله مثل الله وياك او الله يحفظك او دير بالك على نفسك و بذلك بيحس باهتماج فيه و هو نفس الشئ يبحاول يبينلج انه انتي مهمه في حياته و حاولي انج دائما تسالين خواته عنه يعني شو حاله شو صحته يعني جي و صدقيني شوي شوي بطبعج بيتغير لانه دائما الريال مثل اليهال يحب حد يحسسه بالاهتمام و صدقيني بعد مدام خوات يقولون انه دومه يقول عنج جيه معناها انه هو يحبج ومهتم فيج بس حاولي معاه شوي شوي و باذن الله بتحصلينه تغير و الله يوفقج و يسعدج و تراني هذي خبرتي عن الرياييل لاني متزوجه و عن تجارب ربيعاتي و صدقيني اذا حصل تغير خبريني و الله يهديه و بغيت اقولج شئ بعد مدام العيد ياي يبيله هديه مثل ساعه و عطر او اي شئ ثاني و على كل مناسبه حاولي تهادينه لانه بعد جي هو بيتغير وبتشوفين اذا ما يابلج بعدين على كل مناسبه هديه وبتقولين اختج ام وديمه قالت و اسمحيلي على كثرة الكلام بس حبيت اني اريحج الغاليه واي شئ بغيتي سويلي رساله خاصه و قولي اللي بخاطرج و اذا تبين انج تكلميني انا جاهزه و انا تراني اختج

  7. #7
    عروس مشرقة الصورة الرمزية um_fa6ame
    تاريخ التسجيل
    27/02/2005
    الدولة
    في بيتنا
    المشاركات
    497
    بخبرج شي وفكي عمرج انا اخوي مالج من شهرين وانا احاول معاه يكلم مرته موراضي يقولي دخيلج الحرمه مافيها شي بس انا اسمع عن المشاكل الي تصير قبل العرس مع ربعي وخليني بعيد ولاحقين عالسوالف بعوضها بعد العرس

  8. #8
    مشرفة سابقة الصورة الرمزية &&_عاشقة الجوري_&&
    تاريخ التسجيل
    23/05/2005
    الدولة
    &&__ في جنة النعيم باذن الله __&&
    المشاركات
    2,829
    عزيزتي تصرف خطيبك يمكن يكون نابع من طبعه
    دامه يمدحك ويثني عليك هذا كافييمكن زوجك من النوع الي مايحب يبين حبه
    ويمكن يكون من نوع الرجال الجافين شوي
    لذلك مثل مااقول دايم حل المشكله الاول الصراحه
    وانتي كلميه بس بدون عصبيه
    واذا هذا طبعه تاقلمي معاه دامك عارفه انه يحبك وهذا المهم

  9. #9
    عروس متألقة
    تاريخ التسجيل
    10/07/2003
    الدولة
    أبوظبي
    المشاركات
    214
    أشكركم جميعا على ردوودكم الجميلة و انا اتصلت اعتذر علي بدر مني و كالعادة مستغرب ليش انا زعلانة. بس انا قررت اني ما اتصل فيه لاني احس اني اذل عمري و خليه مثل ما يبي هو.. و بعض البنات قالوا سويله هدية انا ما اشوفه عشان اعطيه اياه لانه ما ايي بيتنا. على العموم احس انا كلكم كلامكم صح بس انا احس عمري مجروحة من عدم الاهتمام.

  10. #10
    عروس رائعة الصورة الرمزية عروس مسقط
    تاريخ التسجيل
    17/01/2004
    المشاركات
    1,103
    اختي في رجال ما يعرفون يعبرون ايام الملجه و بعد الزواج لما يعيش مع المراة في بيت واحد يحس فيها اكثر
    يمكن زوجك تقليدي ما يؤمن بالكلام و السلام في ايام الملجه و انت تعرفين ان هذا شي وارد في مجتمعاتنا الخليجية و خاصة الأماراتي
    و انت كالمره من حقج تسمعين منه كلام حلو
    ااذ ما تقدرين تواجهينه ليش ما ترسليله مسج تكتبين فيه كل احساسيج و شوفي كيف برد عليج

    و الله يوفقج

  11. #11
    عروس نشيطة
    تاريخ التسجيل
    11/10/2004
    الدولة
    السعودية
    المشاركات
    185
    لاتزعلين ولاتتضايقين افرحي باايامك

    وبعدين لاتكدرين نفسك وخلي كل شي يجي طبيعي

    بعد الزواج ان شاء الله بيكون لك وحدك اكيد هو من النوع اللي مايعبر عن احساسة بالطرق اللي كل بنت تتمناها

    كلها فترة وتعدي

  12. #12
    عروس متألقة
    تاريخ التسجيل
    10/07/2003
    الدولة
    أبوظبي
    المشاركات
    214
    والله ادري يا خواتي ان كلامكم صحيح لاني جربت العديد من الوسائل عشان يحس فيني حتى انى مرة قطعت مسجاتي له تقريبا شهر لاني ما اكلمه وايد لكن و لا عبر و لا حس! شكلي بحاول اطبق نصايحكم و اشوف و احاول اني ما ازعل بس هذا صعب. و اكيد انتوا حاسين اشلون صعب الشعور بالاهمال و الرفض. و اعرف ريلي مايي بالتهديد و الزعل يمكن الكلام الحلو شو يغير من طبعه و بعدين انا استحي اقله الحقيقة يعني شو سبب زعلي بس بحاول اتجرأ و الله كريم و باخبركم ان شاء الله يآخر التطورات......

  13. #13
    عروس مبدعة
    تاريخ التسجيل
    01/09/2005
    الدولة
    إماراتي الحبيبة
    المشاركات
    593
    حبيبتي ادري انج تبين تحسين بفتره الملجه وحلاوه هالفتره من كلام وغزل ورمانسيه ومسجات الخ الخ الخ
    بس نفس ما قالو البنات يمكن ريلج من النوع اللي يسمع وايد عن المشاكل وما يبى يعور راسه او يمكن يحس انه من النوع اللي ما يعرف يكون على طبيعته في التلفون ويزيد الطينه بله فجي يقول خلنا لين نعرس عشان تعرفني ونفس ما قالو عقب بعوضها
    فهمتي الغاليه
    بس اهم شي الاستخارررررررررره لازم سبع مرات وذا حسيتي براحه وانه مافي مشاكل عرقلت الزواج عيل هذا نصيبج وهذا الانسان اللي بيسعدج حبيبتي ولا تتكدرين بس بعد ليش ما تصارحينه وتشوفين وجهه نظره
    واضح انه ريلج مش مراهق نفس اغلبيه الشباب ومبين انه عاقل..ويازينه اذا طلع جذي..المهم صارحيه ولا تحسسينه انج تبين سوالف وحب وغزل..حسسيه انج ناظجه وانج بس تبين تعرفين الاسباب اللي تمنعه انه يكلمج..قوليله بس ابغي اتطمن هل هالشي له خص بكونك مثلا مغصوب علي او ما في شي يشدك لي؟؟؟؟ اذا طلع السبب اي شي ثاني غير هذيله فتطمني وحطي ببالج انه الايام اليايه بتكون احلى من الملجه والله يسعدج حبيبتي انتي وبنات امه محمد اجمعين

    وبقولج شي اخير انا ريلي فتره الملجه كان ما يخليني اقعد مع اهلي من كثر الاتصال..يهريني مكالمات وهالشي قام يسبب مشاكل بيننا لدرجه اني بغيت اصارح اهلي اني ما بغيه..بس لاني صليت استخاره كان في شي يمنعني اني اصارح اهلي..تصدقين صبرت وتزوجنا وطلع انسان بالعشره مختلف تمااااااااااما عن التلفون يعني طيب ومسامح ويدلعني..بس بالتلفون كان عصصصصصصصبي ويغار وايد ويبى اي شي عشان يتضارب معاي..جني عدوته هب مرته تصدقين؟؟والحين اي حد يتزوج من ربعه ..يقوله ريلي انصحك لا تكلمها الكلام ما وراه الا مشاكل وعوار راس..انا كنت بخسر مرتي بسبب الكلام..تخيلي انه ربع ريلج يقولون جي لريلج..او تخيلي انه ريلج عاقل وفاهم وواعي لهالشي بدون ما حد يقوله وهو يحببببببببج وما يبى يخسرج

    لا تتضايقين وستخيري ثم توكلي على الله

  14. #14
    عروس نشيطة
    تاريخ التسجيل
    06/02/2003
    الدولة
    Dubai
    المشاركات
    123
    حبيبتي بقولج لج و أمانة عليج تضحكين.. ما نبي نشوف الكدر على وجهج و نتي بعدج عرووووس

    اي جذي ابيج تضحكين..

    حبيبتي.. لا تتضايقين.. وايد رياييل في هــالفترة تعرفين شو يقولون بينهم و بين نفسهم

    " شلون أشوف الكيكة و لا آآكل منها"

    لان في حدود تحدهم عنا بسبة العادات و التقاليد.. عشان جذي تشوفينهم يكابرون و يتجنبون..

    انا وياج انج محتاجة تحسين بالاهتمام و الدلع.. صدقيني.. بعد مدة بنشوف موضوع منج عنوانه..

    " غرقانة دلــــع يا ناس" <=== قولي آميين انتي بس.. و هونيها تهوون..

    بس انتي لا تقصرين.. لا تخلين عيد و لا ذكرى ميلاده الا و تهنينه فيها..

    و ذكريه بعيد ميلادج.. و طرشيله سلام مع خواته.. او طبخي شي و طرشيه بيتهم.. الا ما يطرش لج مسج ويقولج تسلم ايدج

  15. #15
    عروس ذهبية الصورة الرمزية النجم الساطع
    تاريخ التسجيل
    19/03/2003
    الدولة
    أرض الحرمين
    المشاركات
    2,521



    لاتزعلين ولاتكدرين نفسك كثير من الرجال ما عندهم القدرة على التعبير وصدقيني عدم إتصاله فيك
    مايعني إنه مايحبك يمكن هو من النوع الخجول ويبي كل شي يكون بعد الزواج ومثل ماقالت لك إحدى الأخوات
    لاتعودين نفسك على الزعل من اليوم لأن الحياة الزوجية وأقولها لك عن تجربة سنين يدخلها بعض الفتور
    ويقل فيها كلام الحب والرومانسية وراح يجي يوم تتعودين على أشياء كثيرة وخصوصا بعد مايكون عندكم
    أطفال

صفحة 1 من 2 12 الأخيرةالأخيرة

المواضيع المتشابهه

  1. ادريبي طفرتكم.. بس ما حد عندي غيركم
    بواسطة M!sS 7ala في المنتدى إستفسارات النساء و الحمل و الولادة
    مشاركات: 3
    آخر مشاركة: 19/06/2009, 01:40 AM
  2. سؤال غريب بس ما عندي حد غيركم ..
    بواسطة شيخة البيت في المنتدى النساء و الحمل و الولادة
    مشاركات: 4
    آخر مشاركة: 08/11/2006, 01:15 PM
  3. ما عندي احد اشكيلة همي.......غيركم
    بواسطة طايره في السماء في المنتدى قضايا وحلول
    مشاركات: 10
    آخر مشاركة: 23/10/2006, 07:32 AM
  4. بليز ساعدوني .. ما عندي غيركم
    بواسطة visitor في المنتدى ركن العناية بالبشرة والجسم
    مشاركات: 3
    آخر مشاركة: 03/02/2005, 07:38 PM