مآ أطيبهآ /
صُباحَ / مسُاء
يجمٌعنيَ بكمٌ.. بـ " أحٌلى" تعابيُر الغٌلا
تحيٌة معٌطرهُ بـ " ماء الورٌدَ "
وجنٌائنَ منُ الزهورُ لـ قٌلوبكم
من فتره وانا حابه احط موضوع كامل لااطباقي بالمطبخ اطباق ممكن تكون يديده عليكم واطباق يمكن تعرفونها
نبدي بسم الله
ماشاء الله تبارك الرحمن
المنيو
سلطه الوان الربيع
سلطه اليونانيه
سلطه الزيتون
سلطه المعكرونه
كفته بطاطس
كفته دياي
عيش ولحم بالخلطه
عيش ودياي باكياس الشواء
حمسه ربيان
جيب التاجر بالتوست
شاورما دياي
صينيه جلاش بالدياي
صينيه دياي ببطاطس الودجز
ملفوف محشي
حلا التيراميسو
كيكه الكابتشينو والكراميل
كيكه التمر
ايس موكا
سلطه الوان الربيع
مافيها شي جديد الا تنوع الالوان والخضروات اللي تفتح النفس
المقادير
خس مقطع كبار ومنشف زين
ملفوف ابيض مقطع شرايح رفيعه
ملفوف بنفسجي مقطع شرايح رفيعه
جزر مبشور
طماطم مقطع مكعبات
خيار مقطع مكعبات
ذره مصفيه ومغسوله
زيتون اسود
السوس
(عصير ليمون + زيت زيتون +سماق+ملح + ريحان ونعناع جاف ) نخلطهم زين ونحطهم يالثلاجه لوقت التقديم
نيي للسلطه نقطع كل الخضروات ونحطها بطبق التقديم ونخلط معاها السوس
السوس ماحطها الا وقت التقديم واخلطها حتى لاتذبل الخضروات وتكون فريشش
سلطه اليونانيه
المقادير
خس مغسول زين ومنشف ومقطع الى قطع متوسطه الحجم
طماط مقطعه مكعبات
خيار مقطع مكعبات
زيتون اسود وزيتون اخضر
جبن فيتا مكعبات او اي جبن مالح
بصل مقطع جوانح رفيعه
لاتحبي الفلفل الرومي ممكن تضيفينه
السوس
شويه ملح وعصير ليمون وفلفل اسود وشويه خل زيت زيتون نخلطهم ونحطهم بالثلاجه
بوقت التقديم نخلط المكونات مع السوس ماعدا الجبن نضيفه اخر شي ونزينه برشه كزبره او اوريقانو
سلطه الزيتون
المقادير
زيتون اسود شرائح
زيتون اخضر شرائح
طماط مقطع مكعبات
خيار مقطع مكعبات
جز مبشور
ذره
بصل اخضر
السوس
ملح ليمون زيت زيتون سماق نعناع ناشف نخلطهم زين ونحطهم فوق الخضروات
سلطه المعكرونه
المقادير
معكرونه مسلوقه اي شكل
ذره
خيار مقطع مكعبات
خيار مخلل
طماط مقطع مكعبات بدون لب
زيتون اسود
جزر مبشور
جبن كيري مقطع مكعبات
السوس
2 ملعقه مايونيز
زبادي
ملح فلفل اسود نعناع ناشف نخلطهم ونضيفهم على الخضروات واخر شي نضيف جين الكيري
كفته البطاطس
من الاشياء المحبوبه برمضان واللي تتفرزن وتنفع لللاوقات الصعبه
المقادير حسب عدد الاشخاص
6 بطاطسات مسلوقه ومهروسه
علبه جبن كرافت مبشور او جبن موزريلاا
حشوه لحم مفروم او دجاج نحمس بصل مع شويه زيت لين يذبل ونضيف له الثوم المهروس واللحم المفروم ونضيف له البهارات ملح كمون كاري كزبره مطحونه فلفل اسود باببريكا شويه قرفه بهارات لحم اخر شي نضيف كزبره مفرومه مع الجبن المبشور
يسلق البطاطس و يهرس و اضيف الملح حسب الرغبة
و اضيف في البطاطس ربع بيضه حتى يتماسك
احمر البصل و اضيف اللحم المفروم و البهارات و الملح
عند استواء اللحم اضيف البقدونس
ابشر الجبن و اضيفه على اللحم المفروم
ااخذ البطاطس و اكورة كورة وافردة و اضيف اللحم المفروم
واشكلها على شكل اصبع او اقراص او كور على حسب الرغبه
اغمس اصبع البطاطس في البيض ثم البقسمات
واقليها في الزيت الغزيو وساخن و اقدمها
كفته الدياي
نص ديايه مسلوقه ومنتفه نفرمها مع
2 جزر مسلوقه
بطاطسه مسلوقه
كزبره وبقدونس مفرومه
بيضه
بهارات دياي ملح كمون كاري كزبره مطحونه بابريكا فلفل اسود
نخلطها ونشكلها على شكل أصابع وندخلها الثلاجه ونقليها بزيت ساخن
عيش ولحم بالخلطه
سبق وحطتيه بالقسم بس محد عبرني بس برجع اكتبها
المقادير حسب عدد افراد عيلتج
لحم او دجاج نسلقه بماي مغلي فيه بهارات صحيحه اعواد قرفه ورق غار وحبببات هيييل ومسمار وبصله
وبهارات لحم وكمون وبهارات منوعه بس بحال سلق اللحم لاتضيفين ملح لانه مايستوي بسرعه ونحاول نشيل اللي يتجمع فوق
كاس ونص رز انا استخدم باب الهند مغسول ومنقوع حوالي ربع ساعه
خضروات مجمده كثرت منها حتى استخدمها فوق الوجه
بصل مفررروم
ثووم مهروووس
زنجبيل مبشوور
بطاطس مقطع مكعبات ومقلي
صلصه طماط
بهارات لحم وبهارات مشكله كمون وفلفل اسود وكركم وكزبره مفرومه وبابريكا ولومي اسود مطحون
مكعب مااجي
نص فنجال ماي ورد منقوع فيها زعفران
الطريقه
نحمس البصل المفرروم بشويه زيت لين يتغير لونه ونضيف له الثوم والزنجبيييل ومكعب الماجي ونضيف له ورق غار ومسمار ونضيف له الخضروات والبطاطس ونحركهم شوي حتى لاينهرس البطاطس ونضيف له البهارات كمون وكاري وكركم وكزبره مطحونه وبابريكا وفلفل اسود ولومي مطحون شويه بس وبعد ماتستوي نشيل الخلطه ع جنب
نسوي الرز بالطريقه العاديه وبعد مايستوي الرز نحطه بالجدر اللي حمسنا فيه الخلطه ونحط جزء من الرز ونحط شوي من الخلطه ونحط طبقه من الرز لين ينتهي بيصير طبقات اخر طبقه الرز نضيف لها الماي الورد والزعفران ونكتم القدر شويه ونجيب فحمه مولعه ونضيف لها شويه زيت زيتون ونحطها بالجدر ونغطيه لين تاخذ الريحه
نرجع للحم اللي سلقناه نحطه بصينيه وندهنه بخلطه مكونه من صلصه طماط وثوم مهروس وزيت زيتون وبهارات مشكله ونخلطم زين وندخلهم الفرن يتحمر من فوووق
عيش ودياي باكياس الشواء
المقادير
ديايه مقطعه الى قطع
بصل مقطع جوانح
2 فص ثوم مهروس
رز مغسل ومنقوع بماي لمده ربع ساعه
صلصه طماط
صلصه باربيكو
بهارات منوعه بهارات دياي وقرفه فلفل اسود كمون كاري كزبره مطحونه بابريكا لومي مطحون كركم
ورق غار
شويه خل ابيض
زيت زيتون
اعواد قرفه
عصير ليمون
الطريقه
نسوي العيش بالطريقه العاديه نسلقه بماي مغلي وملح ونصفيها
نتبل اللحم بصلصه الطماطم والباربيكيو والبهارات والخل وزيت الزيتون وعصير ليمون واعواد القرفه ورق الغار ونخليه بالتتبيله لمده ساعتين
نحط الدياي بكيس الشواء ونربطه زين ونفتح فتحه بسيطه فيه ونحطه في صينيه وندخله الفرن
لما يستوي نشيله من الكيس ونحمره
لما يستوي نقدمه وممكن نسوي له اي خلطه للوجه خضار مشكله او بصل مقلي
حمسه ربيان
ربيان منظف ومغسل ومسلوق في ماي مغلي وبهارات صحيحه وبهارات ربيان
باذنجان مقلي
كوسا مقلي
جزر مسلوق
بطاطس مسلوق
بصل مفروم
ثوم مهروس
طماط مفرومه
صلصه طماط
بهارات ربيان وبهارات مشكله
الطريقه
نسلق الرز بالطريقه المعتاده
نحمس البصل لين يذبل لونه ونضيف له الثوم ونضيف الطماط لين يذبل ونضيف الربيان المسلوق ونحركه ونضيف له البهارات ومعجون الطماط والخضروات وشويه ماي مغلي بس يغطي الخضار ونخليهم يتسبكون مع بعض
جيب التاجر بالتوست
المقآدير
كيس توست
حشوه اللي تحبينه حشوتي كانت
حمست بصل مع ثوم واضفت له دجاج مسلوق ومنتف واضفت له الملح والبهارات واضفت الفليلفه مقطعه مكعبات سغيرونه لين ذبل واضفت الجزر المبشور واخر شي كزبره مفرومه
مايونيز
بيض وبقسماط للتغليف التوست
ناخذ شريحتين توست ونحطهم فوق بعض ونفردهم ونقطعهم بقطاعه او كوب دائري
وبعدين على طول نغسمهم بالبيض ومانخليها وايد وبعدين بالقسماط
نقليها بزيت ساخن وغزير ونخليها تنشف
نقصها من النص وونمسحها بالمايونيز ونحشيها بالحشوه
صنيه جلاش بالدياي
المقادير
عجينه جلاش
دجاج مسلوق ومنتف
بصل مفروم
ثوم مهروس
جزر مبشور
فليلفه
كزبره مفرومه
بهارات منوعه
للتغطيه
علبتين قشطه و4 ملاعق كبار جبن سايل
وجبن موزريلا
الطريقه
ندهن الصينيه اللي بنسوي فيه زبده وناخذ ورقه من عجينه الجلاش بحيث تكون عند الاطراف وندهنها بفرشته فيها زيت زيتون وندهن بين كل طبقه وطبقه بالزيت زيتون لا تكثرون مسحه خفيفه ونكرر لين 5 طبقات
نسوي الحشوه نحمس بصل مفروم لين يتغير لونه ونصيف الثوم المهروس والدجاج المسلوق ونضيف البهارات وملح ونضيف الفليفله ونحرك ونضيف لها الكزبره المفرومه والجزر المبشور
نضيف الحشوه فوق طبقه الجلاش ونضيف السوس ونتاكد انه غطى كل الدجاج ونرشه بجنبه موزريلا
وندخله الفرن يتحمر من تحت ومن فوق وآنتبهو لها تتحمر بسرعه ترى مو تحترق عليكم
ونخليها تبرد شوي ونقطعها
صينيه دياي ببطاطس الودجز
صنييه سهله وبسيطه ومايبي لها شغل واييد
خلونا بالمقادير
انا استخدمت صينيه متوسطه موكبيره فااحتجت لـ :
كيس ودجز
بصل مفروم
ثوم مهروس
صحن صدور دجاج مقطع الى شرائح ومتبل عصير ليمون وزيت زيتون وشويه صويا صوص وبهارات منوعه كمون كاري كزبره مطحونه فلفل اسود بابريكا
فلفل رومي مقطع شرائح
مشروم
جبن قشقوان او جبن موزريلا افضل نوعيه جربتها برايد تذوب بسرعه وفيها نوعيه اسمها برزدين
السوس ( علبه قشطه عاديه مع شويه قشطه خفق لا ماعندج عادي ممكن تستغنين عنها مع 3 ملاعق كبار جبن سائل )
بهارات منوعه
نص مكعب ماجي
الطريقه
ندخل الودجز للفرن ونحمره بدون زيت ولاحاجه او حابه تقلينه وتنشفينه مو مشكله
نحمس البصل ع النار لين يذيل ونضيف الثوم والدجاج لين تنشف الماي اللي فيه ونضيف الفلفل وخليه يذبل ونضيف المشروم والبهارات ومكعب الماجي وانتبهي لاتضيفين ملح وايد لانه سويا سوس فيها ملح والجبن ومكعب الماجي
ناخذ الصينيه ونصف فيها طبقه من البطاطس ونرشها فوقها الجبن المبشور وبعدين الحشوه واخر شي البطاطس ونحط فوقها السوس وفوقها الجبن الموزريلا ندخلها تتحمر شوي من تحت ومن فوق وبالعافيه
شاورما بخبز الصاج
نبدي بمقادير الخبز مو بس يستخدم للشاورما اي سندويشه
العجينه :
3 ك طحين كويتي او طحين فوم احسن نوعيتنن جربتهم
ملعقة صغير خميرة
ذرة ملح
ملعقه كبيرة سكر
كاس وربع ماء دافئ
ملعقه صغيرة Bb
بيضة
حسب الرغبه ملعقه صغيرة حبة سوداء
تعجن وتترك تتخمر 20 دقيقة ..
ثم تكور وتترك تتخمر قليل وتفرد رقييقه وتوضع على صاج ساخنه وتطلع الفقاقيع من الخبز حتى تصبح بنيه او ذهبيه , وتوضع في حافظة علبه حتى لايبس ونغطيها ايضا بفوطه صغيره
مقادير الشاورما
صدور دجاج مقطعه الى شرائح ومتبله( بزبادي وثوم مهروووس وفلفل اسود وكمون كثرت منه كزبره مطحونه وبهارات شاورما جاهزه من ماجي منوعه سماق زيت زيتون شوي هيل مطحون ملعقه صغيره خل قليل من القرفه بودره البصل ملعقه صغيره بشر ليمونه وونتبه بس ناخذ الجزء الاصفر لان الجزء الابيض مر
نخليهم باللتبيله 4 ساعات
بمقلاه على النار نحمس بصل حتى يذبل ونضيف الثوم المهروس ونضيف لها الدجاج ونتركه يستوي على نار هادئه حتى ينشف مايه ونضيف له الملح ونقلبه حتى يستوي نحضر جمره ونحطها بوسط المقلاه ونضيف لها شويه زيت زيتون ونغطيه بسرعه نحضر الخبز ونمسحه بخلطه مكونه من مايونيز وقليل من الزبادي وطحينيه ونحط بطاطس مقلي ومخلل خيار وطماطم شرائح بدون لب وملفوف ابيض وشوي من الدياي وونسكرها ممكن اضافه الجبن ونحطها بالشوايه حتى يذوب الجبن
حلا التيراميسيو
المقادير :-
2 كريم كراميل انا استخدمت واحد نص
2 دريم ويب
2 قشطة
1 كاس حليب سايل
1 جبن فيلادلفيا
بسكويت شاي او بسكويت ليدي فنقر
الطريقة:-
تخلط المقادير مع بعض ثم يوضع البسكويت بقاع الصينية بعد تغميسه بالنسكافيه ثم نضع طبقة كريمة ثم بسكويت ثم كريمة ثم يرش بالكاكاو البودرة انا استخدمت جالكسي مبشور وندخله تبرد بالثلاجه كل ما طالت مده التبريد طلعت الذ
كيكه الكابتشينو والكرامييل
المقادير
كاس وربع طحين
ثلاث ارباع كاس سكر
نص كاس حليب سائل
بيضتان
نص كوب زيت نباتي
ملعقتان كبار بيكنج بودر
ملعقه كبيره فانيليا
3 ملاعق كبار بودره الكابتشينو اللي تجي بالمغلفات
مقادير السوس
بياله سكر نحمسها ع النار لين مايتغير لونها ويصير ذهبي نشيلهامن ع النار ونضيف لها علبه قشطه ونخلط بسرعه حتى مايتكتل
ومره ثانيه سويته بها السوس
ربع اصبع زبده يوضع على النار حتى يذوب ثم نرفعه عن النار
وربع علبه حليب مركز(نستله)يخلط حتى يتجانس نضع عليه ملعقه كبيره فول سوداني
وممكن اي سوس كريمي
طريقه الكيكه
نسخن الفرن ع درجه حراره 180 بزبديه نحلط المواد الجافه
بالخلاط اليدوي نضيف البيض المخفوق للمواد الجافه وتكون سرعه الخفق بطيئه ثم نضيف الحليب تدريجيا ونخلطه وهو ينخلط ونضيف له الزيت ونخلطه لين مايتجانس
ندهن الصينيه بزيت ونسكب المزيج وندخلها الفرن من تحت وبعدين من فوق لمده نص ساعه او حسب فرنج يعني لين تصير ذهبيه اللون او بنيه فاتحه ويمكن اختبارها ندخل فيها عود او سكين تنتاكد انها استوت
نصب السوس عليها بعد ماتبرد ونزينها باي شي حابينه
كيكه التمر ماخذتها من منتدى غير لحد يطب ويقول كوبي بيست
المقااادير
- كأس تمر خلاص منزوع النواة + نص كأس سكر + نص كأس زيت + نص كأس حليب سائل + 3 بيضات + ملعقه قرفة .. ونحطهم بخلاط الكاس لما يتجانسون ,
وبعدها نحطها بزبدية , ونخلي بالخلاط خليط بمقدار نص كاس
ونأخذ الزبدية ونضيف للخليط الي فيها كأس ونصف طحين + ملعقة بيكنج باودر ونخلطهم بالسلك اليدوي
نصب الخليط بصينيه مدهونه وندخلها فرن من تحت بعدين من فوق حوالي ربع ساعه وعلى حسسب فرنج
نرجع الحين للخلاط والي فيه , ونضيف له حبتين او 3 جبن كيري وكم ملعقة حليب نستلة . ونخلطهم شوي بالخلاط ونحط الخليط ع النار لمده دقايق معدوده
ولما تجهز الكيكه نصب عليها السوس ونزينها بالفستق او جوز البيكان
هالكيييكه من الذ الكيكات وطعمها وريحتها روووعه خاصه مع القهوه
ختامها مع ايس موكا يبرد على القلب
كاس حليب بارد
ثلج
نص ظرف دريم ويب
ملعقه كبيره ايسكريم فانيلا
ظرف موكا
انا احب نكهه الكوفي قويه اظيف ملعقه صغيره زياده نسكافيه
سكر حسب الرغبه ولو انه ما يحتاج
تخلط بالخلاط وتصبيه في كاس مزينته بخطوط هيرشي وفوقه كريمه او ايسكريم وعوافي
بجذيه انتهى موضوعي انا تعبت في الكتابه وتحميل الصور لاتنسون ذكر الله
لآروآحكم .
واتمنى الردود + تقييم
رد مع اقتباس
المشاركة الأصلية كتبت بواسطة الاميرة امورة
