مرحبا
وعدتكم اعلمكم طريقة الماكرون والحين انا عند الوعد راح تضبطونه ان شاء الله اذا اتبعتوا خطواتي
.................................................. .............
الماكرون : هو سويت فرنسي مكوناته لوز وسكر وبيض بكل بساطه..يشبه في تحضيره المارينغ ،كل حبه مثل البرجر في شكله ،،وله عدة نكهات حسب الذوق ،،
فستق، جوكليت، بندق، فراوله، توت، ماتشا كابتشينو والطعم التقليدي اللي هو اللوز .. والمجال واااسع فالنكهات ..تقدرين تبتكرين نكهات اضافيه...الطعم بالنسبه لي ألذ بألف مره من باول ولينوتر ..انا شخصيآ ماأحبه ابدددآ من عندهم احب طعم اللي انا اسويه
اهم شي الدقه فالمقادير وتطبيق الخطوات بالتفصيل عدم اهمال اي خطوه ،،
الكميه تعادل 50-60 حبه او حسب الكميه
راح اعرض اول شي الصور والخطوات باختصار وفالاخير المقادير مع الطريقه بالتفصيل
.................................................. ........
200 غرام سكر باودر ( ينخل بعد الوزن)
+
110 غرام لوز مطحون ( انا افضل طحن اللوز بدل شراءه ناعم ورح تشوفين الفرق فاللون حتى ) اتوقع المطحون جاهز مغشوش مع النشا ..فالافضل طحنه فالبيت
(نخلطهم مع بعض وننخلهم )
.................................................. ........
100 غرام بياض بيض (بدرجة حرارة الغرفه) مايعادل 3 بيضات حجم كبير
ملاحظه : يفضل تفصلين البياض عن الصفار وتخلينه في المطبخ مغطي بقطعة قماش لمدة 24 - 48 ساعه ... انا اخليه مرات 12 ساعه ..ومرات ادفى البيض اذا مستعجله ويضبط معاي
.................................................. ........
اهنيه ضفت 50 غرام سكر عادي بعد ماخفقت البيض وصار فيه رغوه خفيييفه
.................................................. ........
وخليت الخليط ينخفق لحد ماتصير رغوه ثقيله بس مب واااايد ...الرغوه لازم تكون مثل الصوره
.................................................. ........
خليط البيض ضفته على خليط اللوز والسكر الباودر
.................................................. ........
هالخطوه وايد مهمه ..اذا زدتي في الخلط او قللتي مابتتكون لج رغوه في حافه كل حبه او بتتكون رغوه غليظه
والصح ان لازم تتكون رغوه صغيره ..
فالطريقه انج تلفين السباتيولار شوي شوي وبحركه دائريه حولين الخليط،،فالبدايه بتحسين انج ماتخلطينه عدل بس بعدين راح ينخلط ويندمج ...لا تزيدين الخلط اكثر من 60 لفه ..
في هالاثناء اذا حابه تضيفين لون ضيفي ..
واذا حابه تقسمينهم الى 3 قسميهم بعد الخلط ..وضيفي حق كل قسم اللون اللي تحبينه ..انا احط نقطه من اللون + نص ملعقه صغيره بودرة بياض البيض علشان مااخرب سيولة الخليط
واذا بغيت جوكلت اضيف نص ملعقه كبيره جوكلت باودر
او الابيض ماضفت فيه شي ..
.................................................. ...........
صبيت الخليط في كيس الحلويات ..وشكلتهم على ورق زبده او السيليكون القابل للحراره (قطر كل حبه ثلاث ارباع انج راح ينفرش معاج وبيصير اكبر- حاولي تسوينهم نفس الحجم- )
وخليت الصواني في فالمطبخ مفتوحين لمدة ساعه علشان تتكون طبقة قشره على سطح كل حبه
في هالاثناء :
.................................................. ..........
احضر الحشوات ..حسب كل لون ..
مثلآ الحشوه الخضره : لوح جوكلت ابيض ذوبته فحمام مائي مع شوية دبل كريم وكمية من الفستق المطحون فرش ..ماعندي قياس معين !! لازم تكون شوي غليظه
حشوة الجوكلت : لوح جوكلت بالحليب او الغامق + دبل كريم في حمام مائي
الحشوه البيضه : لوح جوكلت ابيض + دبل كريم في حمام مائي + ضفت عليه كراميل مكسر ناعم
بعد الساعه دخلت الصواني فالفرن :
.................................................. ..........
بدرجة حرارة 325 لمدة 10 دقايق
وبعدها خففت عالحراره وخليتها 275 لمدة دقيقه الى دقيقتين
وبعدها طلعتهم من الفرن يبردون ،،وبعدين شلتهم من الورق وكل حبه حطيتها جنب الحبه اللي قدها
.................................................. ..........
اهنيه سهلت على نفسي المهمه ،،قلبت كل طبجه علشان اعطر عليها الحشوه عالسريع واسكرهم
.................................................. ..........
وهاي شكلهم بعد ماسكرتهم
.................................................. ...........
وبعد ماتفيقت وصورتهم على رواااق
والحين مع المقادير مره ثانيه مع الطريقه :
المقادير :
200 غرام سكر ناعم
110 غرام لوز مطحون
100 غرام بياض بيض ( او 3 بياض بيضات ) بدرجة حرارة الغرفه
50 غرام سكر عادي
الطريقه :
1- ينخل السكر الناعم مع اللوز المطحون ويترك جانبآ
2- يخفق البياض خفق اولي بسرعه عاليه الى ان يظهر فيه رغوه خفيفه
3- يضاف له السكر العادي ويتابع الخفق بنفس السرعه الى ان يصبح رغوه كثيفه بيضاء
4- يضاف خليط البيض الى خليط اللوز والسكر ويخفق بالملعقه البلاستيك ( السباتيولار) بحركه دائريه وبسرعه بطيئه
5- يضاف اللون ..او يقسم حسب الرغبه الى 3 اقسام ويضاف اللون لهم..
6- يصب في صينية (بعد وضع الخليط في كيس حلويات -الفتحه دائريه - ) الصينيه مفروشه بورق الزبده ( مع مراعاة تثبيت اطراف ورق الزبده بالخليط ) .
7- تترك الصواني لمدة ساعه خارج الفرن
8- تدخل الفرن لمدة 10 دقائق على درجة 325 ثم تخفض الدرجه الى 275 ددجه وتترك لمدة دقيقه الى دقيقتان
9- يخرج من الفرن ويترك ليبرد ثم يزال من الورق ( الحبات طريه جدآ بعد اخراجها من الفرن يرجى ترك الحبات ليبردوا ) خخخخ امحق فصحى
10- يحشى بالحشوه المناسبه
ويقدم
انصح تقديمه ثاني يوم لأنه بيكون الطعم احلى وأترف
وبالعافيه
لا اسمح بنقل مواضيعي ..ايآ كانت الاسباب ..الا باذن مني او من منتدى عروس
رد مع اقتباس
المشاركة الأصلية كتبت بواسطة nice2eyes
