السلام عليكم ورحمة الله وبركاتة
عيد مبارك على كل العرايس الحلوات ينعاد عليكم بالحب والسعادة وراحة البال امين F:
وكالعاده انبه الموضوع جهد شخصيييييي ولا أحلل اي حد يقوم بنقله الا بذكر اسمي واسم الموقع وشكرا لكل الناس اللي نقلت مواضيعي مع حفظ الحقوق :o
وبمناسبة العيد حبيت اعمل ديزاين مانيكير يكون رقيق وجديد
اسم الديزاين اقتبسته من أغنية la vie en rose ( الحياة الوردية ) للمغنية الفرنسية اديت بياف
شكل ال la vie en rose
الديزاين عبارة عن خلفيه لونها ابيض لامع مع تدرج مابين اللون الاورانج والبينك وعلى فكرة سهل جدا ومش متعب بالمرة والديزاين جديد و ينفع مع كل الضوافر قصيرة او طويلة
نبدأ بسم الله
الادوات المطلوبة
1- مانيكير ابيض لامع للخلفية
2- نختار لونين مانيكير عشان يكونو التدرج وانا اخترت الاورانج والبينك .. على فكرة اختارو اللونين دول على حسب ما انتو عايزين
3- مانيكير ابيض مط
4- الجديد اللي هنستخدمه هو اسفنجات ودول انا سحبتهم من مخدتي هههههههههههههه يعني اتصرفو ;)
5- اعواد اسنان
كالعادة اول خطوة بنحط البيس كوت ونسيبه لحد ما ينشف
بعدين ندهن الضفر كله باللون الابيض اللامع كا قاعدة للديزاين وبليييز سيبو المانيكير ينشف خصوصا الخطوة دي لانها الاساس فا خلو المانيكير 10 دقايق لحد لما ينشف تماما مهما كان نوعه
هنا هنحط كام نقطه من اللون الاورانج على ورقه وتغمس طرف الاسفنجه في المانيكير و مننساش نشيل زوايد المانيكير يعني نضغط عالاسفنجة مرتين لحد لما نلاقي الاسفنجة بتكتب عالورقة هيئه نقط زي الصورة
هنلف الاسفنجة على السبابة عشان نتحكم فيها كويس
بعدين نبدأ بطريقة التربيت او الطبطبه نحط المانيكير في صورة مثلث مايل زي الشكل
هنا صورة اقرب عشان تشوفو الشكل ازاي هيكون بارز ونسيبه ينشف تماما وعلى فكرة مش هياخد وقت طويل يعني بالكتير 5 دقايق والمانيكير هينشف
بنفس الطريقة هنعمل مع اللون البينك .. نحط كام نقطه منه عالورقه ونغمس الاسفنجة في المانيكير وبعدين نشيل الزوايد عن طريق تربيت الاسفنجة عالورقة مرتين ونلفها عالسبابة
هنبدأ بطريقة التربيت نحط اللون البينك على طرف الضفر مرورا للداخل بحيث يبان عندنا ان الالوان اكنها بينك واورانج متدرجين زي الصورة ونسيبه ينشف تماما
وفي النهاية ممكن نعمل وردات بالجزء الابيض لو المساحة تكفي على ضفر او اتنين باستخدام اعواد الاسنان ودي انا كنت شرحتها في الديزاينات السابقة او نعمل نقط يعني حسب كل واحدة وذوقها ودا بيكون الشكل النهائي
اتمنى الديزاين الجديد يكون نال اعجابكم وتسلمو كلكم على تشجيعكم ليا في مواضيعي السابقة جزاكم الله كل خير :adore:
وانبه مره تانيه موضوعي مجهووووود شخصييييي لا احلل بنقله لاي موقع او منتدى بدون ذكر اسمي واسم الموقع
لو عجبكم موضوعي المتواضع ادعولي ربنا ييسر حالي ويرزقني بالزوج الصالح عاجل غير اجل :o
ودمتم بخير F: