السلام عليكم ورحمة الله وبركاته ..
طبعاً دائما نشوف مواضيع خاصة بتعطيرنا لكن ماقد قريت وحدة كتبت عن طريقة تعطيرها لثياب زوجها او ابوها او اخوها ..!
ليه؟؟؟:mad:
طبعاً كثير منا راح يقول ان الرجال يعطرون نفسهم ومايستعينون بزوجاتهم او بناتهم كثير :rolleyes:..بس راح اقولكم أنه هذا شي ينبسطو عليه الرجال لو سويتوه بدون ماتشوروهم ..سواء آباءكم او ازواجكم او اذا انتو حنينين مرة اخوانكم ...ليش لأ ..؟!
وغالباً يكون فيه مناسبة للتعطير ..يعني مناسبة فرح او خطوبة او عقد او زواج او عيد او يوم الجمعة قبل صلاة الجمعة ..
راح اتكلم عن طريقة تعطير مامتي لأبويه :
اول شي يوم الجمعة من الصباح تبخر البيت باللبان البدوي ( لبان دكر ) يعقم الجو ..وكل يوم بعد مانخلص غداء
وكل ماغسلت ثياب الوالد الداخليه وخصوصا الفلاين الداخلية تبخرهم على المنشر الحديد تبع التبخير اكيد كلكم عارفينه وتستخدم في التبخير شي اسمه( كوب )شكله زي اللبان البدوي بس اسود يجيبوه البياعات من الحبشة ريحته ابرد من اللبان ومن مميزاته انه لو قليتي سمك او عملتي اي عملة سودة بالمطبخ يشفط الروايح الغير مستحبة .. وترش عالملابس اللي في المنشر بكلونيا الليمون اسمه رويال ريحته منعشة مرة نظافة من قلب يذكرني بالصباح لما نروح المدرسة ونحنا صغار امي كانت تروشنا بيه الله يعطيها العافية بس انتبهوا ترى فيه اصلي ومو اصلي ..الأصلي هو اللي عليه الكلام ..ومرة لقيت ببنده زي قارورته بريحة الورد لونه بنك وقارورة لون مويتها ازرق
وبعدين تبخر ثوب ابويه بالبخور الأصلي تحط كسرة صغيرة وتطلع الريحة جنان لوحدها بس ..:adore:
وترش من عطر برستيج من العربية للعود انا اهديته اياه بالعيد
برضه من عطور الوالد : عطر عود شمس من أجمل
فرساتشي الأزرق مرة منعش انا اتعطر فيه قبل اتزوج
وماأقلكم عالريحة يعدي بس في سيب البيت ونحنا بالغرف نعرف ان ابويه خرج ..الله يحفظه يارب ..
مرة تانية راح اقولكم كيف اعطر ثياب زوجي والعطور اللي بستخدمها ..Don’t go away
ودحين كل وحدة تخبرنا عن طريقتة والدتها في تعطير ثياب والدها ..
طلب : :o
بدل ماتشكروني عالموضوع ادعوا لأبوي ان ربي يشفيه ويعافيه والوالدة ربي يحفظها لنا ..