السلام عليكم ورحمة الله وبركاته
كيفكم يا بنات .. اشتقت لكم كتيييير:adore: .. من زمان ما نزلت موضوع ..
المرة حابة يكون الموضوع عبارة عن نقاش نتبادل أراءنا ووجهات نظرنا بخصوص عطورنا اللي بنشتريها من بلادنا العربية على قولة البعض ( العالم الثالث ) ..
دائما بقرأ ردود لبنات عن عطورنا العربية مغشوشة او تركيزها أقل او ريحتها غير أو أو أو ...
أول شي حابة أقول لكم ما في شي أسمه إصدار للعالم الثالث .. كل المنتجات التجميلية من مكياج او عطور وغيره بتتوزع على كل العالم بغض النظر عن الجهة المرسل اليها ..
العطور تركيزها بختلف وصار الاغلب يعرف هالشغلة وصرنا ننتبه ازا كان العطر eau de toilette << وهذا النوع من العطور ما بدوم لساعات كتيرة على الاغلب 4 ساعات بس
وفي عطور تركيزها أعلى بتكون eau de perfume وهالنوع من العطور تركيزها أقوى وبدوم لأكتر من 6 ساعات
وفي عطور مركزة وقوية بتكون pure perfume وهوا النوع أعلى تركيز فيه وسعره مرتفع جدا
وما ننسى طبيعة الجسم في أجسام ما بتثبت عليهم العطور وفي أجسام بتمسك بجسمهم الربحة لساعات وساعات ..
مثلا البنت اللي بشرتها جافة ما بتثبت على جسمها ريحة العطور لساعات طويلة بعكس البنت اللي طبيعة جسمها رطبة
نيجي هلأ للنقطة الأهم وهي راح تكون أهم نقطة وسبب لكتابتي هالموضوع ، بنشوف عطور عند صديقاتنا او قريباتنا او حتى عطور من عطورنا الشخصية اللي اشتريناها من سفاراتنا ورحلاتنا لبره للدول الاوروبية .. بنلاحظ انه العطر ريحته بتختلف او تركيزة بيختلف .. صح هالكلام في منه .. وبننقهر وبنزعل ونقول ليش تركيز العطر بختلف :mad:وليش هالعطر اللي اشتريته من فرنسا ( مثلا ) ريحته غير عن اللي اشتريته من السعودية ( مثلا ):I:ونصير نتساءل مية سؤال وسؤال ^o).. وبالنهاية بنطلع بجواب واحد هو ( احنا من العالم الثالث وما بعرف شو ) :|
بس هالجواب ما له اي اساس من الصحة .. العطور نفسها بتتوزع لكل العالم لكن في شي اسمه ( الفترة المحدودة ) limited edition وأغلب هالمنتوجات بتنزل لعيد او مناسبة . . ولكثرة الاعياد والمناسبات في أمريكا وأوروبا ومنها ( الكرسمس - الايستر - رأس السنة - الاستقلال - الفالانتين - الام - الاب - المعلّم - الهلاوين ( الرعب ) وغيرهم الكتير ) فبنزلوا منتجات خاصة لهالمناسبة سواء كانت جديدة اصدار جديد ولفترة محدودة او اصدار قديم ولكن اضافوا له بعض التعديلات واللمسات الخاصة تليق بالمناسبة سواء عطر او مكياج او شنط او كريمات وغيرهم
خلونا بالعطور .. على سبيل المثال فترة الكرسمس نزل عطور كتيرة ليمتيد اديشن لعطور معروفة مثل عطر شاليمار من جيرلان وعطر ايلelle من ايف سان لوران وعطر رومانس من رالف لوران وعطر هيبنوز من لانكوم وايفوريا من c.k وغيرهم كتير .. بعض هالعطور ريحتها اختلفت شوي عن الاصلية وبعضها نسبة التركيز صارت أقوى وبعضها اضافوا للعلبة شي يميزها للمناسبة ..مع انه نفس العطر ونفس الاسم ..
وهالشي انا متأكدة منه .. عطر ايفوريا مثلا .. اشتريته اول ما نزل من عمان ولما جيت لامريكا شميته نفس الريحة وقبل 8 شهور اشتريته من نفس محل كالفن كلاين من أمريكا وكان نفس الريحة ونفس التركيز .. وعلى الكرسمس نزل اصدار محدود نفس شكل العلبة ونفس الاسم بس ريحته شوي بتختلف لانه لمتيد اديشن ..
وكان عندي عطر بيور بويزن ديور ودولتشي فيتا وديور اديكت من الدوحة ولما خطبت جابلي زوجي gift set من كريستيان ديور من مطار باريس عطور صغيرة فيها ديور اديكت وبيور بويزن ديور ودولتشي فيتا وجادور وميس ديور شيري وريحتهم نفس الشي التلات عطور والله العظيم ما بتختلف لا بالريحة ولا بالتركيز
امريكا واوروبا اعتمادهم الكلي لجلب الزباين وزيادة المبيعات بفترة الاعياد والمناسبات هو تحت مبدأ limited edition عشان الزبون يتميز بهالمناسبة بركض على السلعة اللي بتكون لميتيد اديشن ..
انا قبل فترة اشتريت ماسكارا جيفنشي من سيفورا ( امريكا ) وبداخل الماسكارا ورقة فيها طريقة شرح استخدام الماسكارا بعدة لغات ومن بينهم اللغة العربية .. اللي عندها ماسكارة جيفنشي من اي بلد عربية او اوروبية راح تلاقي نفس الورقة ونفس الكتابة
وكمان منتجات ذا بودي شوب كلها مكتوب عليها بالانجليزي وسطر بالعربي
وأغلب عطوري ( متنوعة من عدة بلدان شي من أمريكا شي من عمان شي من السعودية ومن قطر ومن تركيا ومن لبنان ومن ألمانيا وقبرص لندن وفرنسا ) واكترهم مكتوب على الكرتونة او على نفس العلبة من تحت عبارة ( للاستعممال الخارجي فقط )
اللي متغربة بتلاحظ انه كلامي صح .. عطورنا اللي من الخليج او اي بلد عربية هي عطور أصلية 100% .. طول ما بتشتروا عطوركم من الوكالات المعروفة متل سيفورا وفافافوم وفيسيز وميرش وغيرهم كتير من الوكالات المحترمة والمعروفة والمشهورة والمتعارف عليها دوليا فبأكد لكم انه عطوركم أصلية وما فيها غش ابدااااااااا
اما العطور المغشوشة والمقلدة تباع بأغلب محلات الاكسسوارات والسوبر ماركت او كشك او اي مكان عام غير متعارف عليه دوليا .. وللأسف هالاماكن كتيرة وبقلدوا العطر 100% وبيبعونا اياه على اساس اصلي وبنفس سعر الاصلي وبعد فترة من استخدام العطر بنلاحظ ريحته اختلفت وتغيرت .. الله يعلم من شو بصنعوا هالعطور وقديش بالمستقبل راح تأثر هالعطور على صحتنا وعلى جهازنا التنفسي لانه مش اي واحد بركز عطر او بصنع عطر .. العطور بتتصنع بمختبرات وتحت اشراف كادر كبير من خبراء مو اي شخص بقدر على هالشفلة
فبليز يا بنات اللي بتشتري عطور مقلدة وبتعرف انه مقلدة انا بنصحها تبعد عن هالعطور وتشتري عطورها من اماكن معروفة للحفاظ على صحتها بالدرجة الاولى .. واللي بتقول العطور الاصلية سعرها مرتفع ما في داعي تشتري كمية كبيرة من العطور عطر واحد أصلي بسوى 100 عطر مقلد .. الصحة أغلى ما نملك بلا صحة شو بنسوى
وأسفة طولت بحديثي بهالموضوع بس حبيت الفت نظركم لهالشغلة وعشان نشيل من بالنا فكرة انه امريكا واوروبا ببعتوا لنا بضاعة مش أصلية او خصوصي لنا .. الماركات المعروفة ما بتفكر بهالشي وما بتصنع عطر لناس وناس .. وما بتخرب سمعتهم عشان العالم التالت << ما بعرف مين اللي أطلق علينا هالعبارة
وانا بتقبل اي انتقاد .. قلبي :L:كبيييييييييير