السلام عليكم و رحمة الله و بركاته
صبّحكم الله بالخير جميعاً F:
الحلو اليوم يمكن بعضكم ما يعرفه... هو عبارة عن كيك مشهور بفرنسا باسم "Madeliens"
و كانت تسميته بهذا الاسم على اسم طباخة معروفة...
أنا سويت بحث قبل ما أنزل الموضوع، لأني ما أبي أحط شي مكرر، و لقيت مواضيع كثير تحت هذا الاسم و فيها تشابه بسيط في الطريقة، لكن الشكل مو شكل المادلين الأصلي...
القوالب المستخدمة للمادلين تكون على شكل أصداف...
طبعاً ممكن تستخدمون أي قوالب ثانية، لكن اسمها ما راح يكون مادلين و بتصير كيكة عادية
أترككم مع المقادير و الطريقة و طريقة التقديم :)
نبدأ بسم الله
المقادير: (تكفي 24 حبة)
3 بيضات
نصف كوب سكر
بشر ليمونة كاملة (يفضل ليمون أصفر)
1 كوب طحين
1 ملعقة صغيرة بيكنج باودر
100 غ = إصبع زبدة مذوب و بحرارة الغرفة
1 ملعقة كبيرة عسل
الطريقة:
في البداية، نحمي الفرن على درجة 375 فهرنهايت = 190 مئوية، و ندهن القوالب بالزبدة اللينة...
لا تتدهنونها بنفس الزبدة اللي ذوبتوها! إذا دهنتوها بزبدة مذابة، دخلوا الصواني للفريزر لين تبرد الزبدة و تتماسك بعدين طلعوهم...
و بعد كذا بإستخدام مشخال صغير، انخلوا كمية كبيرة من الطحين فوق القوالب لين تتغطى بالكامل...
بعدين إقلبوا الصواني عشان تتخلصون من كمية الطحين الزايدة...
لازم تتأكدون إنكم دهنتوا الصواني و رشيتوهم بالطحين عدل! لأن هذا النوع من الكيك قابل إنه يلصق بالصينية، و عشان تحافظون على سطح العمل نظيف، افرشوا ورق زبدة عالكاوتنر و بكذا ترجعون تستخدمون كمية الطحين الزايدة...
نترك الصواني على جنب، و نبدا نسوي خليط الكيك...
نخلط البيض و السكر بالخلاط الكهربائي لمدة 3 دقايق، عشان نحصل على خليط نافش و خفيف...
ننخل الطحين و البيكنج باودر و نضيفهم لخليط البيض مع بشر الليمون...
و انتبهوا، في هذي الخطوة ما نخلط بالخلاط!!!
نخلط بملعقة خشب أو السباتولا، و طريقة الخلط من تحت لفوق عشان ما يهبط خليط البيض...
إذا اختفت كمية الطحين، نضيف الزبدة المذوبة مع ملعقة العسل، و نكمل خلط... لا تكثرون تحريك، يعني بس تمتزج المكونات مع بعض ، وقفوا!
الحين نصب مقدار ملعقة كبيرة من الخليط في كل قالب، يعني لازم نعبي 3 أرباع القالب بس! لأنها بتنفش وتعبي القالب، ما نبي نزيد كمية الخليط عشان ما تفيض :)
نطرق الصينية على الكاونتر مرة أو مرتين، بس عشان نطلع فقاقيع الهوا داخل الخليط...
ندخل الصواني الفرن في الرف الأوسط و لمدة 10 دقايق بالضبط!
و إذا جيتوا تصبون دفعة ثانية، اغسلوا الصواني أول!
و هذا شكلها بعد ما طلعتها...
اقلبوها على شبك تبريد، و بعد ما تبرد تماماً قدموها مع الشاي...
الكيكة تجي شوي ناشفة فحلو لو تغمسونها في الشاي لها طعم حلو :)
أما عن طرق التقديم فعندكم أكثر من خيار...
هنا أول مرة سويتها قدمتها مع سكر بودرة عالوجه...
شفتوا شلون شكل حزوز الصينية واضحة! هي اللي تعطي الكيك شكله المميز :)
و هنا شكلها من داخل...
و هنا سويتها مرة ثانية، لكن غمستها من فوق بالتوفي بعدين بالمكسرات و شي غمسته بجوز هند...
ممكن تغمسونها بكاكاو بدال التوفي، وممكن تشربونها بالشيرة، أو تزينونها بخطوط من الكاكاو و التوفي... الخيارات كثيرة و انتوا و أذواقكم :)
إن شاء الله عجبكم و عوافي إن شاء الله F: