مرحبا ياعرايس ياحلوات
كيفكم
اشتقتلكم كتير كتير من زمان ما نزلت مواضيع جديدة
بس اليوم جايبتلكم سويسرول بيدوووووووووب بالتم دوبان طعمته ولا أطيب كان جاييني ضيوف وجربته طلع تحفة وكتير عجبهم
فقررت أني عيده مرة تانية لأن أول مرة ما شالله الضيوف طلعو فيه وماأكل زوجي غير قطعة وحدة
يالله منبدأ بسم الله
أول شي الكل بيعرف أن السويسرول هو عبارة عن كيكة اسفنجية والكيكة الاسفنجية مو بحاجة لا لزيت ولا زبدة بتعتمد على ادخال أكبر كمية من الهواء لداخلها حتى ترتفع وتصير متل الاسفنجة
منحضر المقادير وهي
6 بيضات
نص كاسة سكر بودرة
نص كاسة طحين منخول ومنخلطه مع 3 ملاعق كبيرة من الكاكاو الغامق نوع ممتاز
رشة ملح
ملعقة صغيرة بكنج بودر كمان منخلطها مع الطحين والكاكاو
ظرف دريم ويب وفنجان صغير حليب للحشو
شوكولا خام مع فنجان حليب وملعقة كبيرة زبدة للتغليف
و منجهز صينية فرن تكون مسطحة وكبيرة أنا استخدمت الصينية الأساسية يلي بتجي مع الفرن
مندهنها بزيت ومنحط فوقها ورق زبدة أو قصدير ومنرجع مندهن القصدير بالزبدة الجامدة باستخدام اليد مو الفرشاة حتى تتشكل طبقة عازلة
ومنحمي الفرن على أعلى درجة
أول شي منفصل صفار البيض عن البياض ومنخفق الصفار مع السكر عشر دقائق حتى يصير أبيض متل الكريما
منغسل الخفاقة ومنخفق البياض مع رشة ملح حتى يصير
متل التلج
بعدين منضيف عالصفار المخفوق مع السكر قليل من بياض البيض المخفوق وقليل من الطحين المخلوط مع الكاكاو
ومنخلط بملعقة خشبية بهدوء حتى نخلط جميع المقادير مع بعض
على فكرة قوام الكيك بيكون متل الرغوة
منمد الكيك على الصينية كلها
ومنخبزها بالفرن على درجة حرارة عالية بس ما منحط الكيك بالفرن بالطبقة يلي تحت منحطو بالطبقات العالية فوق الوسط يعني حتى ما يحترق
منخبزو مدة 8 دقائق فقط بس ينضج منشغل النار من فوق 3 دقائق بس ومنطلعو من الفرن منتركه 3 دقايق ومباشرة وهو ساخن منلفه على القصدير حتى ياخد شكل السويسرول لأنه اذا تركناه يبرد وبعدين لفيناه ممكن يتكسر معنا
منلفه بفوطة رطبة ومباشرة على التلاجة مدة نصف ساعة
بعدين منطلعه من التلاجة وبياخد هالشكل
ومنكون حضرنا الدريم ويب
منفرده على الكيك ومنلف الكيك متل السندويشة بس هالمرة أكيد ما منلفه على القصدير الكيك عالكيك بس بعدين منغطيه بالقصدير
منلفه وعالتلاجة
لبينما نحضر الشوكولا للتغليف يعني شي 10 دقائق
بس منحضر الشوكولا يعني أنا استخدمت 100 غ شوكولا خام مع ملعقة زبدة وفنجان حليب منسيحهم على حمام مائي
ومنغلف الكيك فيهم بعدين منقطع الكيك
مممممممممم والله ما رح اقدر أوصف الطعم جد خيال طبعا اذا ضل بالتلاجة لتاني يوم بيصير أطيب وأطيب بس المهم نغطي الجاط منيح
وصحتين وعافية