ازيكوا يا قمرات من كام يوم عملت اكلة صيني وطلعت حلوة وعجبت جوزي اوي الحمدلله ياريت تجربوها وتعجبكوا انتوا كمان هي كمان احسن حاجة فيها انها سهلة :092:
اول حاجة هانحتاج قطع لحم مقطعة رفيع خالص علشان تستوي كويس وبصل مقطع جوانح وجزر مقطع صغير علشان يستوي برضو وفلفل الوان وثوم مقطع وشرايح جنزبيل فريش رفيعة خالص
وهانحتاج كمان زيت عادي وزيت زيتون وصويا صوص وخل ابيض
وشعيرية شفافة اللي بتستخدم في الاكل الصيني انا استبدلتها باندومي علشان مكانش عندي وممكن اي نودلز
الطريقة بقي حطيت ملعقة زيت عادي علي ملعقة زيت زيتون وشوحت فيهم قطع اللحمة كويس مع ملح وفلفل وشوية شطة
وبعد شوية حطيت البصل والثوم والجزر ولما استوت خالص حطيت الفلفل الالوان والجنزبيل وملعقتين كبار صوياصوص ورشة سكر بسيطة اوي (ودي ممكن نستغني عنها) وملعقة خل و لو حسيتي انها محتاجة مية ضيفي ملعقة مية كدة علشان كمان يبقي فيها صوص ماتبقاش ناشفة بس انا ماحتاجتش معايا وبعدين سيبتها علي نار هادية شوية
وفي الوقت دة كنت غليت مية وسلقت فيها الاندومي بالبهارات اللي جاية معاها
وبعدين طلعتها في المصفاة وحطيتها في طبق التقديم
وطبعا اللحمة كانت جاهزة في الوقت دة
حطيتها فورا علي النودلز وكان دة شكل الطبق
قولولي بقي رأيكوا ايه مستنية ردودكوا الحلوة وتقييماتكوا :08:
وبالله عليكوا تدعولي ان ربنا ييسر ولادتي :02: