ازيكم يابنانيت عاملين ايه؟
كل سنة وانتم طيبين
عملت الشيش طاووق وكان معاه رز تكا بس للاسف نسيت اصور الرز :o:(
وادي الشيش طاووق
انا عملت كمية صغيرة لان كنت انا ومامتي بس...
بجرب فيها :D
المقادير:
نص كيلو بانيه
بصلتين كبار
لمونة
ملح وفلفل
بهارات
معلقة زبادي كبيرة
كاري
كاتشب او عصير طماطم
توم مفروم ...حبة صغيرين بس
الطريقة :
بقطع الفراخ مكعبات
بضرب كل الحاجات ماعدا البانية طبعا ف الكيتشن ماشين
لو تحبي تبشري البصل اوكي بس انا بحب اضربه وازوده مية كمان عشان يعمل عصير كتير الفراخ تتشربه بسرعه لاني غالبا بطبخ وانا مستعجلة بحكم الدراسة وكدا
وحطيت جوانح البصل الي هحطها على الاسياخ كمان ف التتبيلة مع الفراخ
وتسيبي الفراخ ف التتبيلة على اد ماتقدري...لو تقدري تبيتيها يكون خير وبركة بس انا مش لحقت :)
بعدها بناخد الفراخ نحطها على الاسياخ الخشب...ومعاها طماطم مربعات وبصل وفلفل المفروض بس انا مش بحب طعم الفلفل عليها :)
بالتبادل
انا جربت احط معاها مشروم كمان على الاسياخ وبتبقى حلوة اوي
بعدين بجيب فرشاة الزبدة بدهنها بيها خفيف
وادهنها صلصة او كاتشب
ونرصها في صينية ونحطها ف الفرن او على النار من فوق
نلاحظ حاجة:
اولا الفراخ بتستوى بسرعه...فمانطولش ف سواها عشان ماتفتلش وتبقى وحشة
ثانيا مانزودش الزبادي عشان مايتجمعش عليها كدا وتبقى زي ماتكون مجبنة
ثالثا: لو سويناها على البوتاجاز مانغطيهاش
لو غطيتيها الغطا بيكتم البخار فتستوي بسرعه جدا بس ماتحمرش...وعلى ماتحمريها ف الفرن هتبقى استوت زيادة وبقت جامدة كدا مش طرية
رابعا:
انا غلطت اني صغرت المكعبات لانها كشت جامد أما استوت وبقت صغيرة اوي فابقوا كبروها شوية:)
وأدي اول طبق لاول رد وتقييم :D
واسيبكم مع الصور...مستنية رأيكم بمنتهى الصراحة :)