انقذوني تحجر الصدر والفطام

الله يكون في عونك ..!

شكلك فاجئتي صدرك بالفطام يعني ما تدرجتي شوي شوي ..!
انا ماعندي خبره لانه ولدي فطم نفس من عمر شهرين وظل يرضع صناعي ..!
بس من المحيط الا انا فيه ( الاهل ) شفت الا حولي واعرف ..!

الحين اذا الالم لا يطاق لازم تشفطي شوي بس لحد ما ترتاحي..
وتخليه يوم يومين ثلاته واذا تجمع ترجعي تشفطي شوي بس..!
وراح تشوفي صدرك نشف خلال هذا الاسبوع خلاص ..!
وراح يكون الالم يحتمل ..

وعلشان ترتاحين الحين عليج بورق الملفوف ..
حطي داخل الستيانه ورقة ملفوف بارد على كل جهه ..
راح يخفف الالم ويقلل من ذر الحليب مثل ما يقلون لكبار ..!

واذا حبيتي ممكن تروحين الصيدله ..
وتسالين الا الصيدلاني وبيعطيج لحبوب المناسبه ..!

ملاحظه: انتبهي ثم انتبهي ..!!!
انك ترضعين ولدج من الحليب المتجمع..!
والمتحجر في صدرك لمدة طويله "4ايام مثلا"
لأنه حليب فاسد وضار..وفتره وتعدي ان شاء الله!

أم السادة أفضل حل عندي لتخفيف الألم الشفط رغم أنك طلبتي غيره من تجارب اللي حواليني صح الحليب معاه يتجدد لكن بشكل بسيط وبعدها يجف لأن اللي يجدد الحليب مو الشفط حركة لسان الطفل وطريقته في الرضاعة

أذكر أختي راحت الحج وبنتها عمرها 4 شهور واعتمادها الكلي الكلي على الطبيعي ... عمرها ما عطتها رضاعة قبلها والبنت أصغر من سن الأكل مو نفس السيد وكانت ما شاء الله عليها ترضع زين وأغلب الأوقات ... وتعبت أمها واجد هناك وجت بتسخن وكانت خايفة تشفط لأن محذرينها اللي هني واللي صاروا وياها هناك ... لكن لما زاد عليها الألم قامت تشفط يدويا وواجد ارتاحت ويوم عن يوم قل الألم ولما رجعت كان فيها حليب بس ما تحس بتحجر وألم ورفضت بنتها ترجع للطبيعي وبس جف بروحه وما طول

............

شفت صورة السادة الصغار في منتدى في الناصفة ما شاء الله عليهم كبروا وصاروا يتشابهون أكثر وأكثر والحلوة زنوب الله يحفظها تجنن بثوب النشل ... طالعة فيه عروسة ما شاء الله عليها

اختي ليش تبين اتفطمينه وانتي اتقولين تحسين بتانيب ضمير والله انها علاقة حلوة بين الام والرضيع
واللي سمعت ان اللي يرضع طبيعي لين عمر السنتين ايكون قدرة التركيز والحفظ عالية جدا غير عن الاطفال اللي ما ايرضعون طبيعي
فياريت اتشفطين الحليب المتيبس فصدرج وعطي حق ولدج
الله ناعم عليج ناس غير يتمنون بس ضمة طفل

الحمد لله انا كلمتج صراحة مثل ما انصح اختي فلا اتزعلين يا الغالية

بسمة أطفالي;10105326:

الله يساعدش حبيبتي ،، فترة صعبة مريت بها عند فطامي بولدي !!

بناتي ثنيتنهم لما فطمتهم كان عمرهم اشهر وكنت حامل ماصادني اي شي !!

بس لما فطمت ولدي كان عمره سنة ونص وبدون سابق انذار!! تحج صدري لدرجة فضييييييعة ماتوقعت يصيدني جديه،، بس بعد ماتراجعت ظليت متحملة الالم اسبوع ليما خف ولله الحمد

سمعت وحدة من ربيعاتي تقول ان ام زوجها تقول ليها ان فطام الولد اصعب من فطام البنت !! ماادري شالفرق يعني!!

المهم اني من زود الالم طرشت زوجي ياخد لي حبوب من الصيدلية ،، بس تبع الصيدلية رفض ، وقال ممنوع نصرفه بدون وصفة طبيب،، وفي نفس الوقت اتكاسلت اروح المستشفى واخذ الوصفة ،، فظليت على هالحال لما جف الحليب!!

بس اعرف وحدة لما صادها جديه راحت المستشفى ووصفت لها الدكتورة حبوب وماشاء الله جف الحليب وخف الالم مرة وحدة !!

صحيح فطام الصبي اصعب من البنية وذلك يرجع لان حليب الصبي اكثر كثافة من حليب البنت وثبت ذلك طبيا مع ان الامام علي (ع) قد سبقهم بذلك السبق العلمي قبل 1390 سنة

الله يكون في عونج خيووو

ويعطيج العافية على الرضاعة اللي وهبتيها لولدج..
أذكر لما بغيت أفطم بنتي في شهر شعبان أمي ما رضت.. تقول هذا شهر توزيع الأرزاق ولا تقطعين رزق الجاهلة..
وطاوعتها..

طبعاً ما قدرت أفطمها بالتدريج لأنها كانت تحن اذا تبغي..

والحمدلله رحت العمرة عنها كم يوم، وشربت ماي زمزم بنية الشفاء.. كنت بس أصب ماي دافي على صدري وما طول وياي الألم الحمدلله..

خيو تحملي تعطين ولدج من الحليب المتجمع لأن حليب فاسد ولا سمح الله يمرض الولد!

جربي الكمادات يمكن تفيدج

شكرا حبيباتي ما خيبتون ظني فيكم !
ام علاوي
شفطت شوي من زود الاحتقان بس ما حسيت بفرق الا بفترة مؤقته !

عروس الجنان
يا رب تطوف هالايام علييي بخير لاني حتى النوم صار صعب عندي :(

بسمة اطفالي رحت المركز وما استفدت تو ماج
كل الي الله قدرهم عليهم برووووووفين وما احس بفايدتها شربت منه مرتين
والله وكيلش حبوب تجفيف الحليب عاطيني منهم حبيتين بس ولا يفوتش لازم اخذ نص نص
ولا حسيت بذاك الزود فرق!

رقم
شفطت شوي مع اني صديقتي نصحتني انطر لبكرة اوشفطه كاااااااااامل يعني اخليه فاضي بس خايفه يرد يتجدد اليي وازود معاناتي كم يوم بعد!
ما شاء الله زين يا رقم عرفتينهم وسط كل الجهال كلهم
عيونش الحلوة يا رقم
بس كسرت خاطري زينب لما شفتها بالصور شلون محترة ومتضايقه واعرفها هي غير عن اخوها ما شاء الله عليه صبور حتى لو حر !

kh.imane
والله اني ما فكرت افطمه من فراغ الا لانه عايف الاكل وما يقدر الوجبات بالاضافه الى اني اخير الايام صادني ارهاق شديد لانه الربع الاخير من الليل يظل طوله ما شاء الله يرضع ولا ينام عدل ولا يخليني انام
والله يعطي الجميع ان شاء الله !

نورمان صح كلامك حتى اتذكر قصه للامام علي لما بغوا يتعرفوا على ام الصبي من البنت وزنوا حليب امهاتهم والحليب الضعف كان لام الصبي !


بنت الاصايل الي خلاني استعجل الله يسلمش هو الصيام باذن الله
واعرف ابني ما ياكل بس معتمد رضاعه
واني ابيه ياكل لانه الرضاعه في هالفترة مو ذات فائده تغنيه عن الاكل
بس الي تحب تكمل الرضاعه للحولين الله يهنيها ويأجرها ثواب وخير ثواب

الله يعينج كلها كم يوم وتخفين

انا صار لي شهر وشوي من فطمت بنتي والحمد لله تمت السنتين على خير

بس من كثر الالم والتحجر الي صادني رحت المستشفى ابغي حبوب تنشف الحليب بس الدكتورة قالت لي ما انصح احد فيها لانها عبارة عن هرمونات وبتخربط لج هرموناتج

ولما رجعن خالتي نصحتني اني اشفطة بس كنت مثلج رافظة قلت ما ابغي يتجدد بس من زود الالم قمت وشفط وحسيت بارتياح و ما رد تحجر صدري منها صار زين ونشف الحليب

شربت نص حبه ما اكمل البقايا يعني
لا تخلوني اصيح حاطه املي على الحبه انها بتخففني
اذا فيها بلاوي هرمونات خلها تولي! :(

فتره وتعدي ان شاء الله ..
ومثل ما قلت لج جربي اوراق الملفوف ومنتي خسرانه شي ..!

وعلشان ترتاحين عليج بورق الملفوف ..
حطي داخلكل صوب من الستيانه ورقة ملفوف بارد على كل جهه ..

راح يخفف الالم ويقلل من ذر الحليب مثل ما يقلون لكبار ..!
جربي وان شاء الله ينفع ..!

جربت اليوم ورق الملفوف وحسيت ببرودته بس ما حطيته على الصدر كامل بس منقطه صغيرة ماا دري ليش ما جتني فكرة تغطيته بالكامل

هلا اختي حالي من حالش

توني تقريبا من 10 ايام فطمت ولدي

اول الايام عاادي

بس تقريبا من جم يوم جاني ألم وشكله الحليب متجمع
وكللش ما شفطت وخليته ولا رحت مستشفى

بس شكله كلام الامهات شجعني بقووم اشفط منه شوي جان يخف الالم!

والله يعينا اجمعين

هونتون عليي شوي اخوات
يعني كلنا في الهوا سوا

الله يعينش خيتوو اني بعد قبل كم يوم فطمت ولدي وصدري تحجر تقدري تشفطيه حتى ترتاحي وبعدين قللي الشفط بالتدريج كل يوم اقل من الثاني كأنش مخففه رضعات الطفل حتى يتعود صدرك وينشف واخر شي اقطعي الشفاط مرة وحدة وبصراحة تعب وألم الله يعينا صدري للحين يألمني بس خف عن اول الايام اهون شوي واحنا بنفطم اطفالنا لايتعبونا في رمضان لان بندوخ وغير هذا ما انصح بحبوب التنشيف اختي جربته سبب اليها دوخة وكتمة وحتى طاحت علينا لان له اعراض جانبية وبصراحة حتى اني صابني تأنيب الضمير واحيانا احس حالي بتراجع بس اذكر اني تعبانة واستمريت الله يصبرنا ويتمم علينا بخير ويحفظنا من كل سوء

noormaram;10107993:
صحيح فطام الصبي اصعب من البنية وذلك يرجع لان حليب الصبي اكثر كثافة من حليب البنت وثبت ذلك طبيا مع ان الامام علي (ع) قد سبقهم بذلك السبق العلمي قبل 1390 سنة

بسمة اطفالي يعني لو الله يرزقني ببنية بيصير اخف علي والله والنعم في مثل هالعلم قال تعالى (وما اوتيتم من العلم الاقليلا)

شكرا ايسمار
من شوي ولدي اوتعى مع صلاة الفجر لانه يرضع كل يوم ههالحزة بس حسيت بتأنيب ضمير بشده
لكن اقول وارد اقول ان شاء الله مرحله وتعدي على خير

ايسمار;10110698:
بسمة اطفالي يعني لو الله يرزقني ببنية بيصير اخف علي والله والنعم في مثل هالعلم قال تعالى (وما اوتيتم من العلم الاقليلا)