السلام عليكم بنات شخباركم
بحاول اختصر كثر ما اقدر
يوم الخميس الموافق 30 يوليو كنت قاعده عادي وشوي وشوي احس بالم بسيط لا يحس
وهاليوم كنت مريضه عدل ومصخنه وحرارتي تقريبا 38 وشي قلت بنزل تحت بيت عمي مع حمواتي عشان ما اقعد بالشقه بروحي واخاف يزيد الالم والتعب واني بروحي واني كنت اقول حق زوجي اطلع وهو يحاتيني بس حرام طول الاسبوع قبل ما اولد كان واجد يسهر وياي
الحين بقولكم شنو صار بالليله هذي كنت قاعده مع حماتي وانا تعبانه من المرض وانا اسولف احس الالم البسيط صار يزيد يروح ويجي وحماتي حست الا اقول بروح شقتي اريح وحماتي ما شاء الله عليها كانت طول فتره الشهر الاخير كل معاي وتحتايني وركبت فوق شقتي وقلت لها روحي اذا زاد الالم بتصل لش وانا ركبت وانبطحت الا امي حبيبتي جايه شقتي تشوفني بس شفت امي قعدت اصيح بس هي فكرت اني تعبانه من المرض لن امي اذا عرفت فيني طلق بتخاف علي وايد وانا البجر عندها المهم راحت امي وزوجي رجع ومشتري عشا بس انا ما فيي قوه حتى اقوم اكل المهم بعد ساعه تقريبا ابتدا الالم متواصل متواصل وكل خمس دقايق يروح ويجي
حمواتي وعمتى كلهم فوق يقولون قومي نروح المستشفى وانا اقول لا اخاف يرجعوني يقولون مو متوسعه شي
زوجي ما صبر وكان خايف علي وودني الساعه 2ونص الصبح جدحفص للولاده الا تقول الهنديه توها واحد ونص وانا كلش ميته من الالم ووحده هناك تقول حق حمواتي لانهم معاي اخذوها اعطوها ادويه وبخور قصدها ماي وزعفران وهالامور مالت الطلق واذا زاد الالم رجعوها رجعوني وانا اصيح من الالم حدي والدم ينزل عليي بشكل متواصل وظلت عمتى وحمواتي معاي وانا كلش بموت من الالم حدي حدي واصيح وزوجي مساكني كنت في حاله يرثى لها المهم الساعه 5ونص الصبح وودني المستشفى وكانت وحده بحرينيه ما قصرت قاست التوسع وقالت مو واجد بس ولاده ودخلوني 6 وشي حجره الولاده والابر وادويه وهالتخطيط مال قلب الجنيين هو الي ذبحني زياده من الالم
من الساعه 6 الا 9 ونص زاد التوسع عدل وانا اتالم وانا من كثر ما كنت تعبانه ابتديت ادفع ادفع وابتدا القابلات يقولون دفي دفعي بس ما كان فيني قوه (تم الحذف لوجود مخالفة صريحة والخروج عن السنة النبوية) وقعدت اصلي على النبي وال النبي اللهم صلي على محمد وال محمد الا ان طلع الراس وشقوني وطلعوا نور بعد ما طلعت ما صاحت وانا اصيح اقولهم ما صاحت بس نظفوها صاحت وشفتها بعد عمري بعد نص ساعه طلعوني وشافني زوجي وباسني فوق راسي وكان حده يبين عليه التوتر وحمواتي بعد وشافوا نور بس كنت كلش انا بدون وعي من الالم والتعب
اما السيم فهو اكره شي بس ما تحسين بالخياط كلش لانش مخدره بس يخف البنج تتبتدي المعاناه وانا قالت ليي الدكتوره الالتهاب عندش شديد من جذي انا الحين اتالم زياده من السيم والالتهاب
الحمدالله اهم شي نور عندي وبحضني ويارب يسهل على الكل (تم الحذف لوجود مخالفة صريحة والخروج عن السنة النبوية)