السلام عليكم
عزيزتي تذكرين مشكلتي إلي ذكرتها في الموضوع إلي قبل .. الحمدلله رب العالمين سرت العمره و الحمدلله تغيرت النفسيه إشوي .. بس ما كملت إسبوع إلا طليقي بعث لي مسج يقولي عمره مقبوله إن شاء الله و يتحمد لي بالسلامه و يتمنى أكون سعيده في حياتي طبعا ما رديت عليه .. قلت أبغيه يحس بقيمتي و إني بعيده عنه كيف حياته .. و غيرت رقم موبايلي على أساس أكون بعيده عن المشاكل
و بعدها عرفت إنه سافر و هو مسافر كان يتعبث بالايميل مالي لين ما عرف الباسوورد و غيره بعدها وحده من صديقاتي باعثه إيميل تعتذر إنه هي كانت السبب في مشكله بيني و بين طليقي لأنه هو شك إنه إيميل واحد .. المهم رد على إيميلها على باله إنه هذا الايميل مالي و كله دعاوي فيني و سب و كله يردد إنه ما يبغيني و لا يبغي يرجعني مع إني أنا ساكته عنه و أحاول أتفاداه بكل طريقه و لا أحد قاله تعال و رجعها أهلي بالمره ساكتين عنه على كثر الكلام إلي سمعته من أهله عليه .. والله إنه إنصدمت من الكلام إلي كاتبنه ما خلى كلمة شينه ما سباني فيها من غير يدعي عليه ما يقول هذي حامل في ولدي ممكن الكلام يأثر عليها .. والله هذا الايميل ممكن يوديه في ستين داهيه لأني لما كلمت أحد في أمن الدوله من معارفي قالي هذي فيها سجن و فصل من الدوام لكن أنا بنت أصل ما أبغي أبهدل أبو ولدي
الله يخليج قولي لي هذا الانسان شو يبغي مني و ليش يراقبني دامه طلقني و هو سافر يغير جو مب إمخلني في حالي أحيانا أحسه يحن صوبي و أحيانا يكرهني!!
و الله الشاهد عليه لو أحس فيه ذرة حنيه إني ما بصد عنه مهما يكون أول حب في حياتي و مستحيل أنساه و أنا عارفه هذا كله من تأثير كلام خواته و تأثيرهم عليه .. و أهلي قالو مستحيل ترجعين له بس عارفه لو جا و إعتذر و أهله إعتذرو و هو تعهد إنه ما يسوي إلي سواه أهلي يمكن يحنون!!