مسابقة المجلس الرمضانية - الإنتهاء: 10/08/2014 في منتدانا عروس - الإنتهاء: 30/07/2014


عـودة للخلف   منتديات عروس > الأركان العامة > الواحة الأدبية > خيمة القصص والروايات

جديد مواضيع خيمة القصص والروايات

إضافة رد
 
LinkBack أدوات الموضوع ابحث بهذا الموضوع
قديم(ـة) 12/09/2008, 04:30 PM   #1
عروس جديدة
 
الملف الشخصي:
تاريخ التسجيل: 28/08/2008
رقم العضوية: 279923
البلد: cairo
المشاركات: 42
الجنس: أنثى
الدولة: مصر

تقييم العضو:
قوة التقييم: 36

yaryorah عضوة جديدة

yaryorah غير متصل
39 كتاب عايزه اتجوز بين ايديكم من غير ولاتعب ولاشراء

تعريف عن الكاتبه ::
غاده عبد العال

اسمها فى المدونه برايدbride

wanna b a bride
العمر: 29
الجنس: انثى
الوظيفة: pharmacist
المكان: مصر
من انا
أنا أمثل 15 مليون بنت من سن 25 إلى سن 35 و اللي بيضغط عليهم المجتمع كل يوم عشان يتجوزوا مع انه مش بإديهم انهم لسه قاعدين

الاهتمامات
READING SURFING THE NET CREATIVE WRITING
الافلام المفضلة
FRENCH KISS SLEEPLESS IN SEATLE ADDICTED TO LOVE
WHILE YOU WERE SLEEPING THE BODY GUARD just like heaven
لا أنام سيدة القصر صراع في المينا دعاء الكروان
الموسيقى المفضلة
عمر خيرت جوليا بطرس فيروز منير نجاة محمد نور

المدونات الخاصة بـ
wanna b a bride
بيت العرايس و العرسان
من جوه
عايزه اتجوز
  الرد باقتباس
قديم(ـة) 12/09/2008, 04:31 PM   #2
عروس جديدة
 
الملف الشخصي:
تاريخ التسجيل: 28/08/2008
رقم العضوية: 279923
البلد: cairo
المشاركات: 42
الجنس: أنثى
الدولة: مصر

تقييم العضو:
قوة التقييم: 36

yaryorah عضوة جديدة

yaryorah غير متصل
114


ده اول حاجه هى كتبتها وطبعا التاريخ مكتوب
ولو لقيت تفاعل انشاء الله احط الباقى
وهى كل فتره بتكتب اجدد حاجه حصلت
وكل اللى تحت اللى باللون البنفسجى ده برايد هى اللى كاتباه
دى صوره كتابها
اضغط على الصورة لفتحها بصفحة مستقلة

وده يوم التوقيع
اضغط على الصورة لفتحها بصفحة مستقلة



Tuesday, August 22, 2006
ياللا نبتدي
سموا كده و خليكوا معايا واحدة واحدة...خلينا نتفق الأول ان موضوع الجواز و العرسان و تأخر الجواز ده موضوع حساس جدا..وصعب جدا انكوا تلاقوا حد بيتكلم فيه بصراحة..خصوصا بالنسبة للبنات....لأن اللي بتتكلم فيه بصراحة يا إما بيتبصلها على إنها قليلة الأدب و ماتربتش ..يا إما على انها مسروعة ع الجواز ..يا إما على انها بارت و مش لاقيه حد يتجوزها..عشان كده تلاقوا بنات كتير بتقول ..جواز ايه بلا نيلة ..يعني هم اللي اتجوزوا كانوا خدوا ايه...انا قاعده في بيت أبويا معززة مكرمة ,ايه اللي يخليني أروح أتبهدل مع حد ماعرفوش..أنا ما بافكرش في الجواز دلوقتي لما أبني مستقبلي ..و الجملة المستهلكة في كل الأفلام العربية .."لما أحقق ذاتي ""...مش عارفه ايه ذاتها دي و تحققها ازاي يعني


يمكن فيه بنات كتير ليهم طموح في دراستهم و في شغلهم ..لكن أتحدي ان أي واحدة فيهم مايكونش طموحها الأول انها تبقى زوجه ..على الأقل لأن دي الطريقة الوحيده اللي تخليها تبقى أم


نتفق بقه على أسس تانية مهمة ....عدد البنات في مصر أكبر من عدد الرجاله
دي نقطة أساسية مش عايزة أي حد يناقشني فيها ( البلوج ده مش ديمقراطي على فكرة) ..و سيبوكوا بقه من إحصائيات الحكومة اللي بتقولك عدد الإتنين زي بعض ..لأن دي إحصائيات عاملة بالظبط زي درجات الحرارة اللي بيعلنوها في النشرة ..يعني الناس بتحلف بالطلاق ان الحرارة أكيد فوق ال 45 ..و هما لا يمكن يزودوها عن 38..أنا ليا واحد صاحب بابا قاللي ممنوع يزيعوا ان الحرارة فوق ال42
عشان السياحة ماتنضربش و السياح مايهربوش


موضوع نسبة الإناث للذكور برده فيها لعب بالطريقة دي..ليه بقه النسبة أكبر؟ أقولكم


موضوع الستات اللي بيقعدوا يخلفوا عشان يجيبوا الولد..يعني فيه عائلات كتيرة تلاقيها كده..4 بنات وولد..5بنات وولد..6 بنات وولد ..و هكذا...و تفضل الست تخلف تخلف عشان البأف جوزها يجيله الواد..يجيبوا يعمل بيه ايه؟ ماتعرفش ..و بيجي في الآخر خايب و نايب و يقعدوا يدلعوا فيه لما يطلع فسدان و يضيعهلم اللي وراهم و اللي قدامهم و اللي جنبهم كمان...ما علينا ده موضوع تاني..بس أي حد بيدرس أو درس في أي كلية في جامعات مصر هيلاحظ ان عدد البنات في أي كلية أكبر من عدد الولاد ..في كليتي مثلا كانوا تلتين العدد بنات و التلت ولاد ..يعني الضعف


نقطة تانية ..الرجالة بقوا حاسين بنفسهم و بيتكبروا على خلق الله من البنات ( يقعدلهم في عينهم و عافيتهم يا رب ) و تلقي الراجل قاعد هو و أمه يتشرطوا ...لازم تبقى بيضا و شعرها بني و عينيها عسلي و شبه نيللي كريم ..الله يخرب بيوتكم طب بص لنفسك يا خويا في المرايه الأول ..طب بلاش بيقولوا الراجل مايعيبوش الا جيبه ..طب شبرقنا كده و ادخل في ايدك انشالله علبة ملبس ..ألا لأ البعيد هو و امه يروحوا يشوفوا العروسة الغلبانه اللي أهلها صارفين عليها الشئ الفلاني و مكلفين قعدة التعارف دي شئ و شويات ..رايحين إيد ورا و إيد قدام ..و البت مافيهاش أي عيب و يقولولكم ..لأ أصلها مش شبه نيللي كريم قوي ..دي قالبه شوية على نجلاء فتحي و انا مابحبش النوع ده ..تقولش حسين فهمي رايح يتقدم للبت


لأ و الأفراح ..نككككتة..زمان كنتوا تشوفوا في الأفلام العربي أي بنت تدخل فرح و هي لابسه شيك كده شوية ..يتلموا عليها الشبان و يبقوا عايزين ياكلوها .. و ما تخرجش م الفرح إلا بعريس..دلوقتي نفس التجمعات بس بالعكس ...تلاقي كل أم قاعده هي و بناتها مراقبين الشباب و ياويله اللي يعدي جنبهم...طارق ..إزيك يا ولد ..مش تيجي تسلم على بنات خالتك شوف بقوا حلوين إزاي؟...أنا مش طارق يا طنط و أنا متهيألي كده حضرتك مش خالتي ...صحيح؟ معلش يا حبيبي العتب ع النظر طب ما تعرفنا على نفسك كده ..يمكن ربنا يحبك و يبقالك نصيب معانا


طبعا الواد يا إما بيطلع يجري ..يا إما حد من صحابه بياخد باله م الكمين اللي وقع فيه ويجي ينقذه على أساس في حد عايزة و كده

طبعا ده غير اللف اللي بيقعدوا البنات يلفوه حوالين العروسة عشان يبقوا واضحين لكل اللي في القاعة من كل الجهات ..و لما بيقف اللف تلاقيهم يزقوا في بعض أو يعملوا انهم بيعدلوا للعروسة فستانها أو طرحتها عشان يطلعوا في الفيديو..و يحاولوا يطلعوا في أكبر عدد ممكن من الصور ..يمكن يعجبوا حد و يتكل على الله و ينتشلهم من عالم الآنسات



الكلام ده كله على فكرة مش المفروض تضحكوا عليه..و الله البنات دول غلابة ..زمان ما كانش مطلوب من أي بنت غير انها تحترم نفسها و تقعد في بيت أبوها و تستنا العدل اللي بيكون في الغالب من إختيار أهلها
دلوقتي الكورة بقت في ملعب البنات ..يعني لازم تخرج و تشتغل و تروح أفراح و تزور أصحابها لأن مسؤلية إحضار عريس بقت ملقاه على عاتقها بالكامل ..أنا أعرف حالات كتيرة أهل البنات بيتخانقوا معاهم خناقات لرب السما عشان يخرجوا و يشتغلوا يا إما عمرهم ما هيتجوزوا .. و م الجهة التانية المجتمع في حالات كتير و خصوصا خارج القاهرة و الأسكندرية مابيرحمش أي بنت تخرج مع راجل عشان تتعرف عليه و يمكن يبقى فيه نصيب ..ده غير ان الراجل نفسه في الغالب ما بيرضاش بيها و يقولك عايز واحدة خام لا خرجت و لا اتكلمت مع حد غيري


طب بذمتكوا البنات يعملوا ايه...ده غير العداد اللي بيعد من أول ماتتخرج من الجامعه ...يعني البنت تعتبر بدأت تعنس من أول ما يعدي عليها سنتين أو تلاتة متخرجه و لسه ماتخطبتش
أنا شخصيا بدأت أحس اني هاعنس من أول ما كملت 23 سنة..طب نعمل ايه


بصراحة المجتمع المنيل اللي احنا عايشين فيه و اللي بيقيمالبنت بجوازتها واللي تتجوز بسرعة تبقة شاطرة واللي تتأخر يبقى فيها عيب ..و ع الجهة التانية الراجل من حقه ينقي و يتشرط و يبقى مقطع السمكة و ديلها و يتقال عليه مفتح و مدقدق..و يبقى معدي الأربعين و من حقه يتجوز في أي وقت انشالله واحده عندها 18 سنة


المجتمع ده ظااالم و مفتري ..و البنات غلابه و الضغط عليهم بيزيد كل يوم والناس بتحاكمهم على حاجه مالهمش يد فيها


خليكوا معايا بقه ..م المرة الجايه كل بوست هاحكيلكم على بلوة م البلاوي اللي اتقدمولي ..عشان تعرفوا احنا بنستحمل أد إيه
::::::::::::::::::::::::::::::::::::
إستفتاحة

هاي يا اللي بتقروا

شوفوا بقه ..البلوج ده أنا عاملاه عشان أفضفض فيه بدل ما أكلم نفسي ..لأني من ساعة ما اتخرجت و بدأ يجيلي عرسان ..و بما إني ماليش أصحاب كتير أتكلم معاهم ..لقيت نفسي ساعات كتيره باتكلم مع نفسي ..أتناااقش و أتخااانق في الأول جوه أودتي و بعدين لقيت العملية وسعت مني و بدأت أكلم نفسي في المواصلات كمان ..فقلت بدل ما العملية تستفحل معايا و يدخلوني السراية و يلبسوني القميص أعملي بلوج أتكلم فيه مع نفسي و معاكم ..على الأقل ما فيش حد هييجي يشحنني ع الخانكة

تمام؟..فهمتوا ..يعني أنا مش عاملاه عشان أشتكي لحد حالي ..لأن الشكوى لغير الله مذلة ..و مهما أشتكيت لطوب الأرض ..فالمستقبل بيد الله و اللي عايزة ربنا هايكون..و أنا ما أقدرش أشتكي لأن ده فيه شبهة إعتراض على إرادة الله ..ربنا يحفظنا

الموضوع ان انا ماليش حد أحكيله فهاحكيلكوا و اطلع الكلام اللي جوايا
  الرد باقتباس
قديم(ـة) 15/09/2008, 02:15 PM   #3
عروس جديدة
 
الملف الشخصي:
تاريخ التسجيل: 28/08/2008
رقم العضوية: 279923
البلد: cairo
المشاركات: 42
الجنس: أنثى
الدولة: مصر

تقييم العضو:
قوة التقييم: 36

yaryorah عضوة جديدة

yaryorah غير متصل

ما احنا قلنا هنمشيها زي أنور وجدي بأه خلاص


بصوا بأه ..أولا الحكاية دي برضه من فصيلة هم يبكي و هم يضحك ..بس الصراحه يعني الصراحه ..انتوا هتضحكوا عليا أنا..هتشوفوا ..بس بقولكوا ايه بما اني فتاه ركيكة ..قصدي رقيقة رقيقة..و مهيضة الجناح..ههه حلوة مهيضه دي..فبليز بليز ..بلاش تريقة



الحكاية دي مايعرفهاش أي حد غير انا و ماما ..ماحكيتهاش لأي حد من أصحابي ..يعني ابقوا اتفشخروا قدام كل أصحابكم بالأمتياز ده ...حصريا على بلوجر ..حكاية العريس التاني ل عايزة أتجوز ..إقرا الحادثة ..اقرا الحادثة




احمم..مقدمة...عارفين ايه احساس واحده و هي ماشية في الشارع و تحس ان حد معجب بيها..مش معاكسه يعني و كده ..لأ بيبقى فيه كده كيميا زي مابيقولوا الأجانب ..و على فكرة فيه جوازات كتير بتبدأ كده ...واحد يشوف واحده في الشارع..يمشي وراها ..يعرف ساكنة فين و يسأل عليها و يخطبها ..ابن عمي عمل كده و البت لسعته حتت قلم على وشة ..علم على صداغه 3 أيام ..قام هو اتكيف قوي و قال البت دي واضح انها مؤدبة و متربيةوراح خطبها ..آه و النعمة..هي صحيح بعد كده اتضح ان ايديها بتطول عليه في كل المواقف مش في الموقف ده بس ..بس و الله الراجل مبسوط و بيحلف باليوم اللي شافها فيه..و بيلعن أبو ...والا بلاش دي في مقام عمتي برضه


المهم أنا يوم نازله من البيت رايحه الشغل..حسيت بكيميا م اللي كنت بقولكم عليها دي ..حسيت ان فيه عين هتخرم قفايا ..اتديرت بسرعه كده في الخباثة لقيتلكم راجل انما ايه ..طول بعرض بارتفاع.ماسك ف ايده شنطة سودا و لابس بدله و كرافته و نضارة شمس....عامل كده زي العيال اللي كانوا بيطلعوا في إعلانات جمعية شباب المستقبل بتاع جمال مبارك "شباب الجيل ..قوام جينا ..هو ..هو" فاكرينهم ؟..المهم الواد كان حليوة و انا قلبي هفهفله أول مالمحته ..استنيت شوية ع المحطه و بعدين جه الميكروباص..ركبت راح راكب ورايا..قلت الشياكه دي كلها هتركب مكروباص ليه يعني..أكيد في الأمر إنا ..و جه كمان قعد جنبي ....يا حلولي يا حلولي..بس كنت خايفه ليعاكس و ساعتها أنا ماعرفش أبويا ..باللي ف رجلي و لايهمني لا شباب المستقبل و لا جمال مبارك ولا حاجه أبدا..بس لاقيته في نص المسافه كده ..بيميل عليا و بيقول باسلوب رزين كده ..لو سمحتي ممكن أسأل حضرتك على حاجه ..وانتوا ماتعرفونيش... باتسطل لما حد يقولي حضرتك ..بس برضه مش سهله يعني..صدرت الوش الخشب و قلتله ..خير بمناسبة ايه ؟...يعني كنت عايز أسأل بس ..هو حضرتك مرتبطه ..واضح انك مش مخطوبة ولا متجوزة مافيش دبل في ايديكي ..بس الإرتباط بأه لازم أتأكد منه من حضرتك ..(حضرتك تاني يا حلولي)..والله الكلام ده مايتقالش في مواصلات و بعدين انا ماعرفكش و مش متعوده أكلم حد ماعرفوش ..طب يعني أنا لو معجب بحضرتك و عندي نيه أتقدم رسمي ..أعمل ايه ..أصلي بصراحه متابعك من مده بس دي أول مرة أتشجع و أحاول أكلمك ..ياحلاوة ياحلاوة متابعني من زمان ..ده واقع بأه..بس برضه على مين ..لازم أثبت ..و الله لو حضرتك متابعني زي مابتقول تبقى عارف بيتي و عارف بابايا ..هو الوحيد اللي ينفع يتكلم في المواضيع دي ..لو سمحت ماتحرجنيش اكتر من كده ..جامده جامده يعني ...الحقيقة انت كده أثبتيلي اني أحسنت الإختيار....ياسلام ياسلام..الله الله ..هو ده الكلام ..لحد كده الأمور كلها صح و مية مية ..صديته آه بس كمان قلتله كلم بابا..سيبتله سكه مفتوحه يعني .



الواد بأه التباع راح شاخط فيا في اللحظه دي ..الأجرة يا أبله والا هتركبواببلاش...يابن اللذينا ..دانا عماله أترسم من ساعتها تبعتر كرامتي كده ؟...جيت أمد ايدي جوه الشنطه لقيتلكوا الأخ بأه راح بسرعه مطلع فلوس و محاسبلي ..لأ مايصحش ..لأ بأه اسمحيلي ..أنا لا يمكن أقبل واحده هاتقدملها تدفع و انا موجود ...وجون وجون وجون ..هيتقدملي خلاص أيوة كده هو انا صحيح ماعرفش هو بيشتغل ايه و الا عايش فين والا بيقلد فنانين والا ايه نظامه بس الجواب بيبان من عنوانه.




أول ما المكروباص وقف لقيته نزل معايا في نفس المحطه و بصلي و قاللي ..أنا حبيت أنقذك يعني في المكروباص ..واضح قوي انك ماعاكيش فلوس...الدم ضرب في نافوخي..وله انت هتتمنظر عليا والا ايه ؟..واضح ان شنطتك فاضية آخر الشهر بأه يالا وفرتلك أجرة المكروباص تنفعك ..بصتله بذهول كده و قلت له ..مين اللي قالك الكلام الفارغ ده ..انا عمري مامشي بشنطتي فيها أقل من 300 جنيه..قالي باستهزاء كده ..لاااااماصدقش..الدم كان خلاص قرب يطلع من نافوخي زي النافورة..رحت مطلعه كل اللي في المحفظه مورياهولي ..أهه حتى شوف 50-100-200-220
لقيته مد ايده اخد الفلوس..و بصلها كده و عدها و قاللي آه صحيح انتي معاكي فلوس أهه


و في لحظه راح مطبقهم و حاطتهم في جيبه ..و قاللي انا هاخليهم معايا بأه سوفينير لحد لما آجيلكم البيت ..ماستوعبتش و قبل ما آخد فرصة أقول كلمه واحده كان راكب ورا واحد على موتوسيكل شكله كده كان ماشي ورا المكروباص و هوا ..فص ملح و داب


أختكوا بأه واقفه في وسط الشارع هابلااااااااااه ..زي اللي اتدلق عليه جردل مايه مش نضيف..مش عارفه أصوت والا أطلع أجري وراه والا ألطم على وشي ...فضلت واقفه يجي خمس دقايق في الشارع مش عارفه اروح فين والعربيات تقعد تزمرلي و لما تلاقيني مسهمة تقريبا اللي سايقين يقولوا في نفسهم دي يا اما طارشه يا اما مجنونة يا اما م اللي بيبيعوا مناديل ..و الناس تعدي تبصلي... و العيال الصغيرة يشدوا في هدوم أهاليهم ..بابا بابا هي الست دي عامله كده ليه؟


بعد شوية كده لفيت و دخلت المستشفى اللي باشتغل فيها ..و على وشي تعبير كده زي تعبير العمده الآلي بتاع زمان ..دخلت الصيدلية..قعدت ع المكتب ..و فجأه .....انفجرت في العياط ..و العيال زمايلي اتلموا حواليا..مالك ..فيه ايه؟...حد زعلك ..حد كلمك؟
من بين العياط و الشحتفه ما اقدرتش أقولهم غير كلمه واحده
.................................................
..................................
..................
اتسرقت
عااااااااااااااا
  الرد باقتباس
قديم(ـة) 27/10/2008, 02:27 PM   #4
عروس جديدة
 
الملف الشخصي:
تاريخ التسجيل: 12/03/2008
رقم العضوية: 233065
البلد: مصر
المشاركات: 12
الجنس: أنثى

تقييم العضو:
قوة التقييم: 39

mona_as عضوة جديدة

mona_as غير متصل
جميلة مستننين الباقى
  الرد باقتباس
قديم(ـة) 14/11/2008, 03:20 PM   #5
عروس فضية
 
الملف الشخصي:
تاريخ التسجيل: 01/04/2008
رقم العضوية: 238617
البلد: ღ ● ღ في حضن "مــــامــــا" وهل هناك أجمل من حضنها ليكون لي وطناღ ● ღ
المشاركات: 2,274
الجنس: أنثى
التدوينات: 2

تقييم العضو:
قوة التقييم: 103

أمورة* تواجدها رائعأمورة* تواجدها رائعأمورة* تواجدها رائعأمورة* تواجدها رائعأمورة* تواجدها رائعأمورة* تواجدها رائعأمورة* تواجدها رائعأمورة* تواجدها رائعأمورة* تواجدها رائعأمورة* تواجدها رائعأمورة* تواجدها رائع

أمورة* غير متصل
اضغط على الصورة لفتحها بصفحة مستقلة



ياسلام هذي أنا أقراها فمجلة خطيييرة وتفطس من الضحك




...
اضغط على الصورة لفتحها بصفحة مستقلة
...




سبحآن الله وبحمده ..سبحآن الله العظيم
ربي اني مسني الضر وأنت أرحم الرآآآآآحمـــين
  الرد باقتباس
قديم(ـة) 14/11/2008, 03:20 PM   #6
عروس فضية
 
الملف الشخصي:
تاريخ التسجيل: 01/04/2008
رقم العضوية: 238617
البلد: ღ ● ღ في حضن "مــــامــــا" وهل هناك أجمل من حضنها ليكون لي وطناღ ● ღ
المشاركات: 2,274
الجنس: أنثى
التدوينات: 2

تقييم العضو:
قوة التقييم: 103

أمورة* تواجدها رائعأمورة* تواجدها رائعأمورة* تواجدها رائعأمورة* تواجدها رائعأمورة* تواجدها رائعأمورة* تواجدها رائعأمورة* تواجدها رائعأمورة* تواجدها رائعأمورة* تواجدها رائعأمورة* تواجدها رائعأمورة* تواجدها رائع

أمورة* غير متصل
اضغط على الصورة لفتحها بصفحة مستقلة



يلا كملــــي




...
اضغط على الصورة لفتحها بصفحة مستقلة
...




سبحآن الله وبحمده ..سبحآن الله العظيم
ربي اني مسني الضر وأنت أرحم الرآآآآآحمـــين
  الرد باقتباس
قديم(ـة) 17/11/2008, 11:12 PM   #7
عروس متميزة
 
الملف الشخصي:
تاريخ التسجيل: 22/07/2007
رقم العضوية: 181118
البلد: عالمي الوردي
المشاركات: 4,558
الجنس: أنثى
الدولة: عمان

تقييم العضو:
قوة التقييم: 186

..لمعة عين.. مشاركاتها محل إعجاب..لمعة عين.. مشاركاتها محل إعجاب..لمعة عين.. مشاركاتها محل إعجاب..لمعة عين.. مشاركاتها محل إعجاب..لمعة عين.. مشاركاتها محل إعجاب..لمعة عين.. مشاركاتها محل إعجاب..لمعة عين.. مشاركاتها محل إعجاب..لمعة عين.. مشاركاتها محل إعجاب..لمعة عين.. مشاركاتها محل إعجاب..لمعة عين.. مشاركاتها محل إعجاب..لمعة عين.. مشاركاتها محل إعجاب


الأوسمة

..لمعة عين.. غير متصل
.~*.~* .~*.~*تــــــــــسلـــــــــــــمي.~*.~*.~*.~*
  الرد باقتباس
قديم(ـة) 17/11/2008, 11:41 PM   #8
عروس نشيطة
 
الملف الشخصي:
تاريخ التسجيل: 06/03/2006
رقم العضوية: 83571
البلد: الاسكندرية
المشاركات: 105
الجنس: أنثى

تقييم العضو:
قوة التقييم: 55

المستبشرة بالله بانتظار خطوتها الأولى للتميزالمستبشرة بالله بانتظار خطوتها الأولى للتميزالمستبشرة بالله بانتظار خطوتها الأولى للتميزالمستبشرة بالله بانتظار خطوتها الأولى للتميزالمستبشرة بالله بانتظار خطوتها الأولى للتميزالمستبشرة بالله بانتظار خطوتها الأولى للتميزالمستبشرة بالله بانتظار خطوتها الأولى للتميزالمستبشرة بالله بانتظار خطوتها الأولى للتميزالمستبشرة بالله بانتظار خطوتها الأولى للتميزالمستبشرة بالله بانتظار خطوتها الأولى للتميزالمستبشرة بالله بانتظار خطوتها الأولى للتميز

المستبشرة بالله غير متصل
كملى
ربنا يكرمك
  الرد باقتباس
إضافة رد


يتصفح الموضوع حالياً: 1 (0 من الأعضاء و 1 من الزوار)
 
أدوات الموضوع ابحث بهذا الموضوع
ابحث بهذا الموضوع:

بحث متقدم

قوانين المشاركة
لا يمكنك إضافة مواضيع
لا يمكنك إضافة ردود
لا يمكنك إضافة مرفقات
لا يمكنك تعديل مشاركاتك

رمز [IMG] متاح
رموز HTML مغلق
Trackbacks are متاح
Pingbacks are متاح
Refbacks are متاح


مواضيع مشابهة
الموضوع الكاتب المنتدى الردود آخر مشاركة
عشبة تنحيف مفعولها قوي من غير رياضه ولاتعب JUST ONE LOVE التغذية السليمة و الرياضة 17 27/08/2008 12:28 PM
عايزة اتجوز ( قصه بطلتها مصرية ) فراشة الإيمان خيمة القصص والروايات 68 09/07/2008 12:13 AM
كتاب صواعق الحق ،،، ردا على كتاب ميزان الحق للقس بفندر ،, كتاب الكتروني جاهز للتحميل السحائب قضايا دينية 3 19/09/2006 01:36 AM
بيت بلا غضب ولاصخب ولاتعب جوري الجنان الشؤون الأسرية و الإجتماعية و أخبار الأعضاء و مناسباتهم 9 17/07/2004 10:56 AM
خلاص هابطل اتجوز من اول يوليو yasema142 مجلس بنات عروس الثقافي 2 13/06/2002 11:47 AM


الساعة الآن +3: 04:29 AM.


جميع المواضيع و المشاركات تعبر عن رأي أصحابها فقط, و لا تمثل بالضرورة رأي موقع عروس.
جميع الحقوق محفوظة لموقع و منتديات عروس © 2001 - 2014
هذا المنتدى يستخدم منتجات بلص

Search Engine Optimization by vBSEO ©2011, Crawlability, Inc.

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141