أفكار و خبرات ركن مختص بعرض تجاربك في المنزل المطبخ والأعمال اليدوية.

صورة أحلام صغيرة الرمزية

حملة الصيف لترتيب المنزل لربات البيوت

03/08/2008, 12:23 PM
السلام عليكم
شخباركم ياحلووين

بما اني اجازة وقاعده احاول ارتب المكان عندي واتخلص من الاشياء القديمه
حبيت انقل لكم هالموضوع اللي عجبني ووايد استفدت منه وانا ارتب

بغيت أعلمكم على طريقة سهلة جدا لتنظيف وترتيب البيت
لأن البعض منكم يستصعب المهمة ويتعايز
بس طريقتي هاي وايد سهلة وممكن اتسوينها على مراحل
مب كلها في يوم واحد :

يلا أباكم اتشاركوني في هالحملة :


بسم الله
استعنا على الشقا بالله

أول شي في حملة النظافة هاذي لازم تكون الأشياء
التالية متوفرة عندج وبدونها لاتبدئين الحملة :

1- أكياس الزبالة السودءا (عزكم الله) لأنها كبيرة وتستوعب أغراض وايدة

2- فوطة ناشفة

3- وفوطة مبللة بالماي

4- معطر للملابس
(أنا حاطة كلونيا اسمها طيب بريحة الليمون في علبة رشاش)
وأبخ منها بين الثياب وتعطي ريحة انتعاش الليمون

5- بوكسات من ايكيا

6- جهزي ريلج وياج !!!!!!!!!!!!
تعرفين ليش لأنج غلط اتفرين اي شي من أغراضه بدون علمه
علشان ما يسويلج حفلة محترمة
ولأنه هو أدرى بالأشياء اللي يباها
في أشياء إنتي ممكن اتشوفينها تافهة بس تراها مهمة عنده
علشان جيه يوم بتبدين التنظيف كل ما ييتي صوب أغراضه
راويه تبا ها الشي وإلا ما تباه ؟؟؟؟
علشان كل شي ايتم بموافقته ((وهاذي طريقتي مع زوجي))
لأنج لو ترييتي إن هو يتزحزح من مكانه
ويتخلص من اللي في كبته
ترا بيخلص عمري وعمرج والريال ما نش من مكانه
فأحسن شي إنج تهجمين عليه وهو يالس في الغرفة بأمان الله
يلعب على الكمبيوتر أو يلعب ويا عياله
وهاتي الأغراض لين عنده وأسأليه تباه وإلا ما تباه ؟؟
ولا تنسين وأنتي تسألينه تحمرين العين
خخخخخخخخخخخخخخخخ



الملابس :

ابتديت بملابسي وملابس زوجي
الملابس والشيل و الغتر والعبي والأندر وير
اللي شفتها جديمة أو خلاص ما تصلح للبس فريتها برع
والملابس الي ما نلبسها وما أعتقد في يوم ألبسها
أنا وزوجي بس حاطينها منظر في الكبت
ما في داعي أخزنها وتاخذ مكان في الكبت
أفضل إني اتبرع فيها للجهات الخيرية أو للفقرا

والملابس اللي كانت أزرارها طايحة أو الزيبر (الجرار)
مالها عالق أو تحتاج تقصير أو تضييج حطيتهم في كيس
علشان أوديهم الخياط ايضبطهم والأشياء البسيطة أروم
بروحي أعدلها مثل الزراير.

والملابس الشتوي طبعا أنا من النوع اللي وايد أعز
البوكسات مال إيكيا دووم متوفرين عندي في البيت
أخزن فيهم الملابس الشتوية سواء لي أو لريلي وعيالي
وأبشر بين الثياب صابون ريحته غاويه مثل بالموليف بالخوخ

وبديت عقب أمسح الكبت من الداخل بالفوطة المبللة
وبعدين بالفوطة الناشفة
وبخيت شوي من الكلونيا على الفوطة الناشفة
ومسحت فيها أرضية وأطراف الكبت


النعول والجواتي :

وسرت عند النعول والجواتي (كرمتو)
واللي شفته ينفع خليته واللي ما ينفع حطيته في الأكياس السوداء
ونفس الشي لنعول ريلي
وبالمره مسحت الجواتي ونظفتهم من البقع
وبوتات وجواتي الفرو والجواتي المسكرة يعني الشتوي عزلته


العطور :

وأمس نبشت عطوري وشفت في عطور ما أستعملها الحين
ولا أدانيها مع إني يوم شريتها كنت بكامل قواي العقلية
خخخخخخخخخخخخخخخ

وريلي نفس الشي في عطور مصفوفة على التسريحة
مرزوزة من سنة أشوفها ما تخلص>>> شو هالبركة
وطبعا عرفت إنه ما عايبتنه الريحة علشان جي ما يستعملهم

أنا أصلا حاطة في الحمام سلة فيها معطرات للجو
المهم وديت هالعطور وضفتهم لسلة العطور الي في الحمام
بدال ما أشتري معطرات وأخسر فلوس



مستحضرات التجميل والعناية والماكياج:

أول شي سويته إني شيكت على تاريخ الصلاحية للمستحضرات
وفي اشياء كانت مش منتهية بس تلاحظين انها استوت يابسة
مثل الماسكات وبعض الكريمات فتخلصت من التالف

بالنسبة لبعض كريمات جسم وبودي لوشن
لقيت علب مفتوحة بس لأن الريحة ما عجبتني
فما استعملتها واستحرمت افرها في الزبالة
فشو سويت يبت العطر اللي بالتولة من أجمل
وخلطته منه كمية بسيطة مع البودي لوشن واستوت ريحته غاويه

ومريت على الروجات والبلاشرات
وتخلصت من الأشياء اللي ما أبغيها
بس نصيحة خواتي أشوف البعض يعطي البشكارة الروجات والماكياج
وها الشي غلط لأنج بتفتحين باب للفتنة في بيتج
وإذا تبغين تهدينها ماكياج فيوم بتي اتسافر يكون أفضل



الأدوية :

خذي لج لفة على الأدوية سواء كانت لج وإلا لريلج وإلا لعيالج
وشيكي على تاريخ الصلاحية
لأني أخاف اليهال يفتحون الثلاجة الرئيسية ويتطاولون الدوا
فخصصت ثلاجة صغيرة خاصة بس للأدوية
وخليتها في غرفة النوم والثلاجة لها قفل طبعا
وكل شهرين أشيك ع الأدوية والتالف أتخلص منه واليديد
أخزنه فيها
وبالنسبة للأدوية اللي ع شكل حبوب وكبسولات ومراهم ولزق
فهاذيلا أخذت بوكس نعال زوجي (كرمتو)
لأن بوكسات نعل الرياييل حجمها أكبر
وكان عندي ورق تغليف للكتب المدرسة مال عيالي زايد عن حاجتهم
فغلفت فيه البوكس ولزقت عليه استكرات حصلتها
في محل بوريال وريالين وعليها صورة جماجم
علشان اليهال يخافون ايقربون صوب هالكرتون >> أونه خطر
ويمعت كل هالمراهم والكبسولات والفكس والبندول ولزق الجروح
في هالبوكس علشان يوم أدور الشي ألقاه
ورفعت البوكس بعيد عن متناول الأطفال


ألعاب الأطفال :

طبعا حدث ولا حرج عندي غرفة كاملة مليانة من ألعاب
الأطفال بعد محاولات عدة شفت أحسن طريقة لتخزين
الألعاب هي الصناديق البلاستيك اللي من ايكيا أو حتى
من السوق الإيراني بتلاقين في عندهم أحجام منها

أول شي سوي جرد للألعاب ولازم الصغارية يكونون معاج
لأن هاي ألعابهم مب ألعابج صح ؟؟؟
وفي أشياء ايحبونها فالمفروض ما تتخلصين منها
لأن الياهل بين فترة والثانية بيدور لعبته

وفي نفس الوقت خلي عيالج معاج لأنهم بيساعدونج
في جلب الأغراض وفي نفس الوقت الصغارية خصوصا
اللي تحت خمس سنين إذا نثرت الأغراض جدامهم
وقلتيله هات السيارات وهاتي كذا ترا يستانس يتحسب
انكم يالسين تلعبون ويا بعض ما يعرف إنج اتسوين جرد
خخخخخخخخخخخخخخخخ

عموما هاتي كيس الزبالة اللي اتفقنا عليه
وخلي عندج قاعدة ثابته غير قابلة للنقاش :

الألعاب اللي أطرافها حادة يعني ممكن تجرح الطفل
أو حجمها وايد صغير ممكن تنبلع
أو فيها شي بارز مثل أريل حاد ممكن يأذي العين
هاذي المفروض على طول بدون ما تسألين الطفل ترمينها في كيس الزبالة
لأن الطفل ما يقدر العواقب وهني دروج


بالنسبة للألعاب الثانية ممكن اتشوفين شو الألعاب
اللي يحبها الطفل وتخلينها واللي متكررة ممكن اتخيرينه بينها
وفهميه إن في أطفال فقرا ما عندهم ألعاب وانج بتعطينهم
الألعاب الزايدة عن حاجته (هاذي طريقتي مع عيالي)

الحين دور البوكسات أو الصناديق
أنا أحب فكرة التصنيف لانها أسهل لي ولليهال
يعني السيارات كلها في بوكس واحد
الكور الصغار في بوكس
الليجو أو مكعبات التركيب في بوكس
والحيوانات في بوكس واحد
فلما الياهل يطلب لعبة معينة ما نيلس انحوس ونجلب الدنيا

الحين دور التنظيف يا خواتي
المفروض ألعاب الأطفال تنغسل وتتشمس بين فترة والثانية
أنا بصراحة بمعدل كل شهرين
يعني الكور والحيوانات والليجو
انقعهم في الطش فيه صابون غسيل المواعين وماي
ينغسلون ويتنظفون وأفرش حصير في الحوش
وأوزعهم على الحصير علشان ينشفون في الشمس
ترا ما ياخذ وقت كلها ربع ساعة
وأرجعهم للصناديق


وفي ألعاب فيها بطاريات فما ينفع تنغسل
بس نمسحها من برع بالفوطة المبللة

وبالنسبة للسوفت تويز مثل العرايس والدباديب
أنا أتعمد أخذ النوعية اللي قابلة للغسل
علشان أغسلها في الغسالة كل ما لاحظت أنها اتسخت


اتمنى استفدتوا من الموضوع

أحلام صغيرة


منقوول



من مواضيعي

03/08/2008, 12:53 PM
يسلمووووووووووو



من مواضيعي

صورة عروس مغتربة عن زوجها الرمزية
03/08/2008, 01:15 PM
ما شاء الله عليج.. الله يوفقج ويسعدج حبوبة..



من مواضيعي

صورة دبدوبه بس حبوبه الرمزية
03/08/2008, 02:17 PM
ما شاء الله عليك شوقتيني اني انفض البيت من جديد
يسلمووو على الافكار



من مواضيعي

صورة عسولة قلبه الرمزية
03/08/2008, 10:20 PM
يعطيج العافية ما قصرتي



من مواضيعي


.. سسسسامحوني عالقـــــصور ..

وشكرا وحده وحده سألت عني والله أدمعت عيوني و أنا أقرآ كلامكم ..



فديت عروس وعضواتهآآ .. :L:
صورة أحلام صغيرة الرمزية
03/08/2008, 11:09 PM
شاكرة لكم مروركم
اسعدتني ردودكم



من مواضيعي

04/08/2008, 05:08 AM
موضوع مفيد جدا

برجع له اذا رجعت بيتي ان شاء الله .!

مشكورة حبيبتي على نقل الموضوع



من مواضيعي

04/08/2008, 07:08 AM
يعطيك الف عافية وجزاك الله كل خير شجعتيني



من مواضيعي

04/08/2008, 11:08 AM
يسلمو ويعطيك العافية.................



من مواضيعي

04/08/2008, 11:15 AM
رووووووووووووووووووووووووعه روووووووووووووووووووووووووعه
صراحه فيه كم حركه قلتيها عاجبتني مررررررررررررررره
لك ودي وتقديري



من مواضيعي

  • 1
  • 2

« الليالي الرومانسية ...طقم المساج الرائع وصل عروس ... | طلب مساعدة عاجل جدا جدا جدا »

يتصفح الموضوع حالياً: 1 (0 من الأعضاء و 1 من الزوار)
 
أدوات الموضوع ابحث بهذا الموضوع
ابحث بهذا الموضوع:

بحث متقدم


مواضيع مشابهة
الموضوع المنتدى
خلطة رااائعة لليدين خاصة لربات البيوت ركن العناية بالبشرة والجسم
معلومات لربات البيوت أفكار و خبرات
منافسة قوية لربات البيوت المطبخ و المائدة
نصيحة لربات البيوت المطبخ و المائدة
نصائح مفيدة لربات البيوت مجلس بنات عروس الثقافي

الساعة الآن +3: 08:47 AM.

 اتصل بنا - اعلن معنا - سياسة الخصوصية

Search Engine Optimization by vBSEO ©2011, Crawlability, Inc.

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141