ابغى طريقة للمجبوس

حبيبتي طلبك مو مجبوس لا هذي برياني دجاج

لأن المجبوس يكون أخضر

طيب بعطيك طريقة البرياني الدجاج

أول شي تاخذين الرز وتغسلينه زين ليما يكون الماي شفاف وبعدين تخلينه ينقع في الماي لمدة 30 دقيقة على أقل تقدير

بعدين تحطينه على النار بالماي ماله بحيث يكون الماي فوق الرز بمقدار 4 أصابع وتحطين معاه الملح وعود قرفه وتشغلين عليه النار ولما يبدي يفور تشيلين الزبد اللي بيتكون فوق الرز (لأن الزبد بيلين الرز) وعشان تعرفين ان الرز إستوى رفعي شويه رز بالملعقة وراح تشوفين فيه تكسيرات معناته أنه استوى (هذي الرز البسمتي الحبة الطويلة) وهو عادة ياخذ ربع إلى ثلث ساعة عشان يستوي.

الحين تاخذينه وتشخلينه وبعدين تاخذين الزعفران المطحون مقدار قليل جدا يعني أنا آخذ بطرق السكين وأحطه فوق الرز وبعدين أخلط الرز وأقلبه بالعدال وهو بعده في المشخال فبيصير عندج الرز ملون أحمر وبرتقالي وأصفر وابيض.

الحين نروح للقدر ونحط زيت وبصل والدجاج مقطع ومغسول ونقلبه مع بعض ونضيف عليه الثوم والطماط الطازج والفلفل الأخضر ونقلبه ليما تحسين إن الدجاج نص مستوي بعدين تحطين البطاطس المقطع مكعبات كبيره والباذنجان إذا حبيتي وتقلبينه زين وبعدين تحطين البهارات (ملعقة بزار مخلوط+ ملح+ فلفل أسود+ لومي أسود+ كركم+ ملعقة صغيره هيل) وتحركينه زين ما زين وتضيفين عليه كاس صغير ماء ورد مخلوط بزعفران وتحركين مره ثانية (واذا حبيتي خفي الماء الورد وحطي علبة روب زبادي واحده عشان يصير عندج برياني بالروب) وبعدين رتبي الدجاج والحشوه في قاع القدر (عشان لما تغرفين تشيلين كل شي) وحطي الرز فوقه ورشي ملعقتين زيت فوق الرز وفي الأطراف عشان ما يلزق وما ينشف.

والحين الخطوه المهمة توطين على النار وتحطين التنكة (قطعة من الحديد نحطها تحت القدر عشان يستوي الأكل بدون ما ينحرق) تحت القدر وتخلينه لمدة نصف ساعة وراح يكون الأكل جاهز للأكل.

أما طريقة المجبوس

هذي عاد المجبوس البحريني

مجبوس الدجاج

على النار تحطين البصل مقدار بصلة كبيرة مقطعة مكعبات (مش مفرومه) وتخلينها ليما يطلع الماي مالها وبعدين تحطين الزيت عليها وتحركينها ليما تشوفين أن لونها مال للبني الغامج (مش أسود) وبعدين تنزلين الدجاج في القدر وتضيفين له الثوم والطماطم وتحركينه زين وبعدها حطي البهارات (مثل بهارات اللي فوق) وحركي زين لين ما تحسين أنه شرب البهارات وممكن تحطين مكعب الماجي بيعطيك طعم حلو، والحين نحط الماي وأهني شوفي كل كوب رز يحتاج كوبين ماء للإستواء، فشوفي إنتي كم حطيتي رز وحطي الماء على قده وخليه يغلي وبعد أول غلوه تحطين الشبنت مقدار حفنه باليد بس مو تكثرين ومعاه الفلفل الأخضر الرومي مقطع مكعبات وحركيه شويه وسكري الغطاء وخليه يغلي ليما تنضج الدجاجه.

والحين ترجعين له ثاني وتشيلين الدجاج وتحطينه في صينية الفرن، وحطيه في الفرن بس من فوق عشان يتحمر. يعني 5 إلى 10 دقائق.

وتاخذين الرز المنقوع والمغسول زين وتحطينه في الجدر لازم يكون الماء يغطي الرز بمقدار صبع فقط، واذا كان الماء زايد عادي غرفي منه وحطيه في مله وخليها جنبه لا تسكبينها عشان يمكن تكونين أخذتي زياده وينشف معاك الرز فترشين على الرز منها.
وخليه ليما ينشف الماء بتشوفين أن الرز بعده ما أستوى ولكن الماء نشف وهذي بيكون الطريقة الصحيحة، فالحين وطي على النار وحطي التنكة تحت القدر وخليه ليما يستوي الرز. ( هو بيستوي على البخار فلا تفتحين الغطا إلا بعد ربع ساعة على الأقل) وإن شاء الله يضبط معاك

على فكره هالطريقتين لأمي

مشكورة اختي قطاف مشكوووووووووووووووووووووووووووووووووووووووووورة يعطيكي العافية و الف الف شكر على ردك و الله افدتيني و انا بكرة راح اسوي طريقة برياني الدجاج يعطيكي الف عافية و يسلم يدك و يحقق امانيكي يارب العالمين....

مشكورة اختي انا من زمان ادور طريقة المجبوس البحريني