لا للزيوت لا للخلطات .. الحل بإذن الله عندي !

السلام عليكم ورحمة الله أخواتي في عروس دوت كوم
أنا بصراحة تعبت من الخلطات والزيوت صارت بشراتنا وشعورنا قدور ومواعين تنحط فيها عصايد
ومقادير وأكل وبلاوي كثيرة .. كفاية علينا اللي يدش في بطونا من هالأشياء .. بعد من برا ؟ :D
ما أبي أطول عليكم عزيزاتي ..
أنا ضد أي خلطة أو زيت .. للشعر
وهذي عن تجربة شخصية .. لما كنت أستخدم الزيوت ولأني كسلانة .. أستمر يمكن شهرين وأوقف
ولما أوقف .. تعالوا شوفوا البانيو الله يكرمكم مليان شعر !!!
والزيوت تخلي فروة الرأس دهنية .. بالتالي يسهل التساقط ويمنع فروة الرأس من التنفس الطبيعي
وكذلك يقلل من تدفق الدورة الدموية فيها ..

لما لاحظت هالأمر امتنعت عن أي زيت .. واستخدمت طريقة بعرضها عليكم ..
صار لي الآن أسبوعين بس .. والله شاهد على اللي أقوله .. صار فيه فرق في شعري ..
تفضلوا اقروا الجدول بالأسفل :

1- استخدام كبسولات يومية فيتامينات خاصة بالشعر والجلد والأظافر
اشتروا صناعات أجنبية .. أعتقد اللي أخذته من نيوزلنده .. وفيه منتجات كثيرة ..
لكن مع احترامي لأخواني في مصر .. فيه منتج مصري اسمه hair & nails لونه وردي
فيه مادة الزنك كثيرة .. وهالمادة كثرتها تسبب اضطرابات في الجسم وصداع ..


2- غسل الشعر مرتين في الأسبوع فقط .. حتى تفرز فروة الراس زيوتها الطبيعية وهي اللي كفيلة بترطيب الشعر .. ونموه .. والحفاظ عليه من عوامل خارجية منها الشمس والطقس .. إلخ
يعني ما تسائلنا .. ايش فايدة هالزيوت الطبيعية ؟ عشان احنا نزيد عليها زيوت وخلطات خارجية ؟
طبعاً على حسب كل شعر .. فيه شعور دهنية تحتاج لغسل الشعر 3 مرات في الأسبوع ..
وفيه شعور جافة .. احتمال تحتاج فقط مرة واحدة في الأسبوع



3- استخدام شامبو وبلسم طبي .. أي شامبو وبلسم يباع في الصيدليات بترخيص طبي
ابتعدي عن الشامبوهات اللي تنباع في الجمعيات .. أنا استخدمت هربال اسنسز .. خشن شعري
واستخدمت دوف خلا شعري دهني وخفيف وشكله مو حلو ..
بصراحة أهم شي تلاحظين انه ناسب شعرج .. وما راح أدقق على نوع الشامبو والبلسم المستخدم
أهم شي ما يكون كريمي أو دهني .. ولا جاف كثير .. ويناسب جميع أنواع الشعر ..
أنا حالياً أستخدم male 'n tail اللي عليه رسمة الحصان .. مع البلسم حقه ..
اغسلي شعرك مرتين فقط بالشامبو خلال الغسلة الواحدة .. وكل عسلة .. تقريبا بحجم الجوز ..
لا يكون أكثر حتى ما يفقد الشعر مرونته ..
وبعد ما تنظفين شعرك عدل من الشامبو ..
حطي البلسم في كفك بس على قدر حبة الحمص .. وافركيه بيدك .. وابتدي من الأطراف للأعلى ..
لا تقربين صوب الفروة ..

واشطفي شعرك بالماء .. ونظفيه عدل من بقايا البلسم ..
ولازم يكون الماء فاتر لا بارد ولا حار ..
البارد يخشن الشعر وما ينظفه عدل ..
والحار يفقد الشعر مرونته وسوائله الطبيعية ..



4- بعد الاستحمام والشعر مبلول .. استخدمي أمبيولات لتساقط ونمو الشعر
هالأمبيولات تباع في كل صيدلية على اختلاف أنواعها .. كلها بإذن الله مفيدة ..
يمكن يفضل أن يدخل في تركيبتها الثوم أو الزنجبيل أو عشبة الجنسنغ ..
فيه أمبيولات من شركة لوريال الأصلية الفرنسية .. مو اللي تنباع في الجمعيات
ممتازة .. كلمي أي وحدة من دول المغرب العربي .. ممكن تجيبه لك
أو اللي تقدر تشتري من النت .. تطلبه مباشرة من موقعهم المعتمد
أنا الآن استخدم أمبيولات اسمها bio seal عجيب والله كرتونته خضرا تنباع في أي صيدلية



5- مشطي شعرك وهو مبلول بمشط أسنانه كبيرة ومتفرقة ويفضل يكون مشط عاجي
أو بروش خشبي كبير ومتفرقة أسنانه ..وترى التمشيط الكثير يضعف الشعر ويجففه ..
عشان كذا لا تمشطون شعوركم واجد .. بالذات اللي شعرها كيرلي أو مجعد ..

6- لما تجففين شعرك ابتعدي عن السشوار .. ممكن بس تمررين عليه هوا دافي مو حار ..
لكن لا تستشورينه كثير .. أكيد كلكم عارفين أضرار السشوار ..


7- لما تلاحظين ان شعرك ناشف مرة .. خذي كريم للشعر والكريمات كثيرة وروائحها حلوة
أنا شخصياً أستخدم بانتين الذهبي .. أو كريم male 'n tail
أيضا بنفس طريقة البلسم .. مقدار حبة الحمص .. وتفركينة بيدك .. وتمسحين شعرك من الأطراف
بعيد عن فروة الراس ..

والكريم بصراحة يخلي خصلات الشعر مرتبة .. اذا شعرك مجعد كأنك مسوية فير طبيعي
وإذا شعرك ناعم .. بيعطيه لمعة ونضارة ..


8- قبل النوم تدلكين فروة الراس خمس دقايق مثل الهنود .. والله التدليك شي عجيب ..

9- أخيراً وليس آخراً لا تنسون شرب الماء .. والفواكه والخضار .. مع اني شخصياً
كسلانة في هالأمر .. لكن الكل عارف فوائد الماء والفواكه والخضار لما فيها من سوائل وفيتامينات تفيد البشرة والشعر والجسم بشكل عام ..

أتمنى اني أكون أفدتكم ..
دعواتكم