الرضاعة الطبيعية تفشلّني !! -- مووضووع ساخن للنقاش !

أنا أول المشاركات..

أنا مع الرضاعة الطبيعية ومستحيل كنت أتنازل عنها الا إذا كانت هناك أسباب صحية،،، صحيح أول ساعة بعد الولادة عطوني عبدالله لإرضاعه وماكنت عارفة شلون آحطه أو أرضعه، بس كنت مصرة أني أتعلم من كثر ماقريت عن فوائد الرضاعة الطبيعية وكيف تقوي الطفل وتخلي مناعته قوية..

ماكنت أتفشل من الرضاعة بس كنت لاأعرف كيف أغطي نفسي عدل يكون أرضعه،، بس بعدين أكتشفت إن التيشرت والبنطلون أفضل بألف مرة من جلابية المرضع او قميص النوم، لأن مايبان شي وتقدرين ترفعين التيشرت قليلا للأعلى وبعد ماتقربين الطفل إلى صدرك مايبان شي. والحمدلله صارت العملية سهلة بالنسبة لي..

أذكر لما وصل عمر ولدي سنة، وحده بالدوام قالت لحد الحين ترضعين طفلك قلت لها إي، قالت أخ ماتحمل طفل شكبره عمره سنه ولحد الحين يرضع مني, بس واصلت وماستمعت لكلام أحد ورضعت إبني قد ماقدرت.

كنت أحصل صعوبة في بيت أهل زوجي مثلا لما كنا نجتمع على الغده يوم الجمعة، كل أخوانه قاعدين وأنا عمري ماركبت غرفهم فوق، بس شاسوي أضطريت أدخل يكون أرضع إبني على راحة..

بخصوص شكل الصدر أكيد تغير بس مو لدرجة أكره نفسي فيها،، وشنسوي هذي ضريبة الأمومة...

بالفعل نفس ماتوقعتين هذا الموضوع مو سهل.. يستحق النقاش فعلاً

انا من يومين بس عطوني ولدي أرضعه بالمستشفى.. ومثل ماقالت الاخت رانيا.. من كثر ما اقرأ واسمع عن فوائد الرضاعة الطبيعية.. من حملت وانا ادعي ربي يقدرني وارضع ولدي طبيعي قد ما اقدر..

وقاعدة هاليومين أحاول .. وبما ان ولدي بالمستشفى واول ايامه عطوه الرضاعة وحلمة الرضاعه هناك كبيرة ويعرف يمص منها.. فمحاولاتي شوي فاشلة هاليومين الي راحوا لانه مايعرف يسحب ويمص من صدري.. بس ما يأست للحين مع اني متضايقة وخايفة ما اعرف.. ومصرة اني احاول وياه كل يوم لما يتعلم..
بالنسبة لموضوع انها احراج او جذي.. السالفة بالعكس فخر بالنسبة لي اني ارضع ولدي الرضاعه الي الله شرعها ليه ومن حقه.. فليش استحي.. المهم اني اغطي روحي عدل لو كنت مع ناس او اروح مكان اهدأ واخف ناس..
بالنسبة لسالفة ترهل الصدر ماقط قريت او سمعت عنها صراحة.. الي عندها خبرة يالله تعلمنا ومنكم نستفيد..
واي نصائح للرضاعة لي كأم جديدة لا تبخلون علينااا :)

شكرا جمانة على الموضوع

موضوع حلو تسلم ايدك

انا من المؤيدات للرضاعة الطبيعية ممكن تكون محرجة نوعاما باوقات معينة مو دائما بس ابدا ابدا ما بفكر او بقول انها محرجة على العكس تماما احسها مصدر ومنبع الامومة يا سبحان الله ووالله افتخر لما كنت ارضع اولادي وابدا ما يخطر ببالي اني اخجل او شي بالعكس لانه شي مفطورين عليه احنا الحريم وطالما ساترة نفسي بغطا صغير او حتى سكارف
فابدا ما بنحرج وما بسئل على اللي حوليي

وكنت دائما لما اروح مكان عام او فيه رجال من الاقارب اضل طوول الطريق بالسيارة ارضع اولادي قبل لا انزل من السيارة يكونو خلاص شبعانين وللرضعة المقبلة يحلها الحلال وخصوص ان اولادي الاتنين ما رضيو وما قبللو البيبرونة (( المرضعة ))

وبالنسبة لصدري مافكرت بهيك موضوع لان للاسف مو بس هو اللي اتغير او حيتغير اشياء كتيير تانية تغيرت عن قبل الحمل
بس بحمد الله وبشكره على نعمة الاولاد وشو مايصير فيني راضية ومبسوطة

مشكوره اخت جمانه على الموضوع المهم

بالنسبة لي انا فآنا من الجماعة اللي تؤيد الرضاعه الطبيعية .. اهو صج واجهتني مشاكل معاها لكن الحمدلله تخطيتها و حبيت اقول ان صج كمية الحليب أقل من الصناعي لكن الفايده في 2 اونس مثل مرضاعه متروووسه من الحليب الصناعي

والله لولا تشجيع امي الله يحفظها و يطول عمرها جان انا هديت الطبيعي من زمان لأن ولدي وايد غربلني في الطبيعي

بسم الله الرحمن الرحيم
الحمد الله رب العالمين

موضوع وايد حلو ومفيد
وكنت محتاجة اتكلم مع احد في هالخصوص

عورتو قلبي والله
كلكم تخطيتو الصعب مع الرضاعة الا انا
توني اقول الى زوجي البارح خلاص مابرضع عبادي طبيعي لان مايبي من صدري
يصرخ ويصيح لما اعطية اياه الا يبي المرضعة
والله يعورني قلبي
من البداية انا علمتة على المرضة
لان ماكان فيني حليب
ولا يشبع وكل يصيح ولا ينام
كسر خاطري علشان جدي
عطيتة المرضعة
شسوي والله ابي ارضعة طبيعي
والله يعورني قلبي لما الحليب من كثرة ينزل على ملابسي
ولا يرضى يشرب
معقولة اقدر ارجع ارضعة طبيعي وهو الحين كمل شهرين
يعني توعد على المرضعة من فترة
عطوني حل ارجوكم

هالله هالله شو الموضوع الكشخة:2_106:يسلمووو



ابصراحة انا ما اعرف اتحكم في قعدتي يوم ابي ارضعه جدام حد عشان جيه لما انسير بيت

ناس انعرفهم او مانعرفهم باخذ جي زاوية صغيرة اقعد ارضعه او ارضعه في السيارة قبل لا نوصل

مع ان مايشبع من الرضعة وهم ارضعه صناعي بعد

بس ماشاء الله اعرف في ناس يرضعون عيالهم سنتين ما شاء الله من كثر الحليب اللي عندهم اللهم لا حسد


تحياتي
همـــس

حلووو الموضوع ..
متابعه معاكم ...

آآآآآآآآآآآآآآآآآآآخ

يعني لازم هالموضوع مشرفتنا ... قلبتي علي المواجع ... دمعت عيوني وأنا في الشغل ... هالنقطة جداً حساسه بالنسبه ليي

أنا مع الرضاعة الطبيعية ... وما أعتقد أن فيها شيء يفشل ... بالعكس أحس بحنان لما أشوف أم ترضع طفلها ... أحس أنها من أجمل اللحظات اللي تجمع الأم بطفلها ... فيها خصوصية ... فيها مشاعر حلوة ... فيها قرب

وبصراحة من غير زعل لما أسمع وحده تقول ما تبي ترضع عشان ما يترهل صدرها يصير خاطري أذبحها ...

أنا كان وزن ولدي عند الولادة كيلوين و160 وطبعاً نقص اشوي ثاني يوم ... وأول يومين ما كان فيي حليب وحمودي كان عنده صعوبة كبيرة في المص بسبب صغر حجمه ... وأنا أصلا ما فيي حلمه بالمره " داخله على داخل " ولما أطلعها بالإبرة تكون متشققة وحالتها حاله ... و جلدي جدا حساس ... الحرق البسيط يعلم فيه طول العمر ، وجا ولدي أبو صفار وتم في المستشفى أسبوع

بس ما استسلمت ... استخدمت الابرة ، والحلمة الصناعية وكنت اشفط على طول " وآكل رهش 24 ساعة معني ما اشتهيه وأشرب لترين حليب رغم أني ما كنت اشربه بالمره " ، وكنت في كل صلاة أدعي ربي ييسر لي ويرضع ولدي مني ، والحمدلله شوي شوي قدرت ارضعه وبدون استخدام الحلمة مثل ما كنت اسوي ... بس كان يرضع من جهة وحده بس لأن الحلمة طلعت فيه شوي وصارت أحسن عن الجهة الثانية

ويوم اللي طهرته كان عمره شهرين إلا شوي " تأخرت بسبب أبو صفار وصغر حجمه " رضعته في المستشفى وكنت غرقانه من الحليب رغم أني كنت حاطه واقي " 3 ممرضات 2 منهم هنديات قالوا ليي شنوا هذا ... كل هذا حليب لأن كان مبلل حتى الجلباب

ومن يومها بدأت المشاكل ... تورمت حلمتي بشكل فظيع وكره ولدي الحليب لأن كان يشرب معاه واجد دم ... وبعدين قطعه تماما لما بلع جزء من الحلمة !!! " شفناه في ترجيعه " وتعب ، وتم يومين ما يشرب شي ... بعدين قام بس يشرب الماء ولما جاع جاع استسلم وقبل الصناعي بس الطبيعي رافضه وبقوة

من جم يوم رجع زوجي من الشغل شافني أصيح و ولدي ذابح روحه من الصراخ ... كنت أحاول أرضعه !!! رغم أنو مرت 3 أشهر ونص لكن للحين أتمنى وأحاول ... وأشفط الحليب لعل وعسى ... لكن هو تقريبا جف

تصدقون حتى أحلامي على طول عن هالموضوع ... عشان جدي أنقهر صدق لما أسمع وحده تقول ما بترضع لا يترهل صدرها

أنا صار واحد أكبر من الثاني بشكل واااااااااااااااااااااااضح ... لكن هذ آخر همي

ان مع الرضاعة الطبيعية حتي لو يترهل صدري ويصل الي الارض لاني اذا بافكر في نفسي علي حساب ابني " يبقي علي الدنيا السلام " ،،، انا كان احساسي من وانا حامل اني ان شاء الله بايكون في عندي حليب وبارضع

والحمد لله ان الحليب ما شاء الله كان كويس ويشبع ولدي وما احتاج لاي حليب خارجي ،،، بس المشكلة اني اشتغل واروح العمل ما اقدر اشفط لانه صدري مرة يوجعني لما اشفط .... خلاص اضطريت اني اعطيه حليب صناعي فترة غيابي واول ما راجع من العمل ارضعه طبيعي ... والي الان الحمد لله ارضعه وطبيعي ....

انا لو عليه ما راضعه صناعي ابدا ،،، بس ارضعة طبيعي ... وان شاء الله في البيبي الي جاي باستقيل وباكون ارضع طبيعي بس ....

انا فعلا استحي لما اكون في مكان عام ،،،، بس بين الاهل ما ستحي ابدا ،،، واحس انه شي طبيعي ،،، ممكن لو معي طرحة اغطي نفسي بس اخاف ابني ينكتم نفسه ...

بس الرضاعة الطبيعية فعلا خلتني ما اقدر البس ملابس عادية الا تكون مفتوحة من قدام حتي اتمكن من اني ارضع اي وقت سواء كنت في البيت او خارج البيت ....
شي ثاني ما خلاتني الرضاعة امارسه بصورة طبيعية هو العلاقة الزوجية " فهمتم علي صحيح " :21_133::21_133:

موضوع رائع جمانة ..

مرات كثيرة تجي على بالي هالتساؤلات اللي طارحتها .. يمكن لان احنا نعيش مجتمع واحد ..

هل تعدين الرضاعة الطبيعية امراً محرجاً، او غير متحضر؟

كل أمر طبيعي يكون مقبول في الغالب .. الا إذا طغت الآراء التعبانة .. تحول الاجايبي للسلبي على حساب الراحة ..

انا عني يوم اللي عطوني سيد صادق اشوفه مباشرة رضعته و زوجي مستغرب .. يقول كأنك مجربة قبل .. لاني كنت متحمسة لهاللحظة .. و اول رضعة له حسيت بأجواء من الامومة و افتخر فيها طبعا .. واحب لو يشوفني احد ارضع ولدي .. منوقدي ؟ انا لي ثواب بكل رضعه !!

و الام اللي تختار الرضاعة الطبيعية لولدها هي المتحضرة لانها اختارت الافضل لولدها .. و من التخلف اللي تخطط من الحمل انها ماتعطي ولدها الا الصناعي و لو ان لها قدرة عالطبيعي ..

هل تخجلين من ارضاع طفلك بالاماكن العامة ؟ ( مجتمعات النساء المغلقة فقط وتحت غطاء ) ؟

عادي .. بس اذا بمجمع اصير على اعصابي لان ولدي حركي ..

هل تعتقدين ان الرضاعة تسبب ترهل الصدر واعطائه مظهراً غير جميل؟

تغير شكل الصدر طبيعي .. بس اكيد بعد الفطام يرجع ياخذ شكله شوي ..

طبعامع الرضاعه الطبيعيه وبلااااااااا منازع لو ماكان لها فوائد الله سبحانه ما خلها لنا سنتين انرضع اعيالنا

انى اهنى فى بيت عمى الحمد الله من مشجعين الرضاعه الطبيعيه وخاصه عمتى ما اتحب اتشوف طفل يشرب مرضعه اذكر يوم اجيب ولدى الاولى كانت دايما تتحلطم عليى ليش اعطى ولدى صناعى عكس امى الى دايماااا تحبطنى وتقول انه مافينى حليب ولدى مايشبع من صدرى

بس ابنتى الحين ماعليى من امى واعطى بنتى طبيعى دام اقدر والحليب كل ما انرضع ازيد فيعنى مسئله ما نقدر انه انقول مافينا حليب دام الطفل دايما يرضع

بنسبه الى الاحراج دام انى متغطيه زين ليش انحرج بس لما اكون فى بيت عمى ويه حميانى ماارضع بنتى يعنى اروح غرفه فاضيه وارضعها
الى بيترهل خله يترهل دام بنتى بصحه وعافيه

طبعا انا مع الرضاعه الطبيعيعه ..

للاسف عرفت فوائدها عقب ما فات الفوت ..

مسكين حمود رضعته 8 شهور بس .. وبعدين قطعت عنه لانه كان يعظني ..

عوضتها في مريومه اللي الين الحين ارضعها طبيعي فقط ..

لكن احيانا احس انها يوم ترضع ما يطلع شي .. ففكرت ومتردده بهالتفكير اني افطمها عقب السنه واعطيها حليب السعوديه ..

شو رايكم ..؟؟

والبنسبه لما نطلع اذا كنا سايرين مراكز ارضعها فالسيارة .. واذا تاخرنا اعطيها اكل اليما نرجع للسيارة ..

اما اذا كنت سايره بيت اهلي ولا اهل زوجي ولا بيت اي احد استاذن انهم يدخلوني غرفه ولا ميلس ولا صاله المهم مافيها احد عشان ارضعها .. اما اني ارضعها جدام الناس انا ما اايد هالشي لانه في ناس عينهم حارة ... بس طبعا شي ما يفشل ..

وبالنسبه لشكل الصدر انا احس ان صدري صغر ..... ما اعتقد ان الرضاعه تسوي ترهلات ولا تشوهات ... بالعكس انا رد جسمي نفس قبل واحلى ..

وسلامتكم

موضوع حلو
انا ولدي مارضعته الا اسبوع واحد بالنفاس وبس
بس بنتي اسم الله عليها رضعتها
والحين عمرها شهرين بس اذا بطلع بره يعني مجمعات او سوق او بزور ناس لا ارضعها من الرضعه الصناعيه
استحي ارضعها جدام الناس يعني حتى لو نساء بس ما اقدر ماعرف :) وتحتاج الرضاعه ملابس خاصه يعني مو اي شي اقدر ارضعها فيه


دمتم سالمين
اختكم شريفة

موضوع جدا حلو

اني ولدي علاوي رضعته لعمر السنه و3 شهور فوقها

والحمد لله كانت رضاعتي له سهله طول فتره الرضاعه ماعدا أول أسبوع


وسبب فطامي له بهالعمر انه كان يعض وما كان ياكل ابدا بس يرضع وفوق هذا السهر





أما بنوتتي أفكر ارضعها سنتيناو اقل بشويه لكني بدأت بإعطاءها رضعه صناعي للأوقات الحرجه


لاني استحي ارضع جدام الناس او بالأماكن المختلطه أحس روحي متبهدله ويه حركه البيبي وأخاف انه بعد

يفطس من الاجواء وهو مغطى

ان مع الرضاعة الطبيعية ....بنتى الاولى مارضعت من صدرى كنت أشفط لها الحليب لاسباب صحي طبعا

وبنتى الثانيه الحمد الله.....ترضع طبيعى... وطعبا ما استحى أرضعها جدام خواتى وأمى بس أكون متغطيه....

بس لما أطلع أشفط لعا حليب....وأرضعها فى السياره قبل ما ننزل

السلام عليكم و رحمة الله و بركاته

موضوع روعــــــــــــة...تسلم إيديكي أم حسين :)

أنا من مؤيدي الرضاعة الطبيعية بشدة...

لكن في نفس الوقت أحس إنها تعمل عوائق في حياتك...

يعني لبسك طول فترة الرضاعة لازم يكون مفتوح من الأمام...

ما تقدري تبعدي عن ابنك كتير...بالذات أول 4 شهور...يعني آخرك ساعتين أو ثلاثة لأنه بيجوع بعد هالوقت...

في الطلعات...يعني لو رحتي مول أو شيء...لازم تروحي غرفة الرضاعة و تتركي زوجك أو الناس اللي إنتي معاهم علشان ترضعي البيبي و ما يجوع ( طبعا هذا أول 4 شهور قبل ما تدخلي الأكل )

لو فات وقت طويل من غير ما ترضعيه صدرك يبدأ يوجعك و يؤلمك...

و طبعا المشكلة الكبرى هي في الفطااااام و عذاب الفطام....



لكن مع كل هذا...يكفي بس إنك تاخذي إبنك و تحتويه في كل حضنك...و تحسسيه بالأمان...و تشوفي يده و هي تتحسسك...و نظرة عينيه و هو سعيد بجوارك...هذا كله يخليكي تتغاضي عن كل شيء يحصل...

الله يحفظ لنا عيالنا يا رب و يقدّرنا فعلا نرضعهم رضاعة طبيعية منتظمة (f)

اااااااااااه ياقلبي..
جمووووون يعني لازم تفتحي هالموضوووع؟؟
طبعا تذكري معاناتي مع حمووود ..والله من يوم انا حامل ما احلم الا باللحظة اللي ارضع فيها البيبي لكن الله ماكتب لي هالشي والحمد لله على كل حال..اهم شي حمووودي صحته زينة ومايعاني من اي شي..ماخليت شي الا سوووويته..تصدقين مع انه عمره ثمان شهور الا اني ساعات اجرب ارضعه من زود ما انا حابه هالشي؟؟
ومع اني ما رضعت الا انه بعد ما بدأ الحليب يجف بالفعل تغير شكل صدري وهذا سبب لي ازمة نفسية ..لكن ولله الحمد استعدت شكل صدري السابق واحلى بعد بفعل التمارين والتدليك اليومي..

انا كنت طول فترة الحمل اتمنى اني ارضع طبيعي
وبعد الولادة رضعتها على طول معن ماكان فيني حليب
وجاني الدكتور قبل لا اطلع ونصحني اني بس ارضعها طبيعي وما اعطيها صناعي كلش
فطبقت هل النصايح بس صارت بنتي ما تتقبل المرضاعة كلش وهل الشي متعب نفسيتي
والفترة الاخيرة قامت ترضع من صدر واحد بس وطبعا هاي مايشبع
لاني احسها ماتشبع وطول الوقت ترضع واذا انا في الدوام ماترضى تشرب شي
عشان جي اتمنى لو انها ترضى شوي تشرب من المرضاعة عشان اقدر اكمل لانها اذا تمت بهل الوضع باضطر افطمها بدري عشان اعوضها عن قلة الحليب

بالنسبة لرضاعة انا ممكن ارضع جدام خواتي بس غير جي ادخل غرفة بروحي ..
واضطر اني ما اطلع لانها ما تساعد والمجمعات نادر ما احصل غرفة رضاعة

بالنسبة للبس هاي يسويلي مشكلة بس توني مفصلة جلابيات خاصة بالرضاعة
والصدر طبعا شكله تغير وخصوصا انها ما تشرب الا من واحد والثاني نشف فواحد كبير والثاني صغير :(