يلا أمهات: خلونا نقارن بين أنواع حليب الرضع..وصحة الطفل..شونوع حليب طفلج؟؟

F

FLoOoOoOoNA

عروس مبدعة

28-03-2007 | 01:12 PM

السلام عليكم ورحمة الله و بركاته..

شو أخباركم يا أمهات ياحلوات، وشخبار عيالكم الكتاكيت...الله يعطيكم ويعطيهم العافية والصحة ويحفظهم من كل شر وسوء...آمييييييين..

المهم...خلوني أدخل فالموضوع على طوووووول...

بنتي انشالله بعد كم يوم بتكمل الشهر الثامن وتدخل التاسع، وهي واايد واايد واايد ضعيفة وعضامها ضعيفة، بس ماشالله عليها وايد تتحرك ويوم أحطها مكان واخليها شوي..أرد واحصلها فالجهة المقابلة...حلو الكلام لين هني...

بس المشكلة انها لين أحين ماتزحف أو تحبي، بس تقعد، فأنا أقول يمكن لانها ضعيفة جسمها مايشلها...بس مثل ماقلت هي وايد تتحرك وتقعد بعد...

هي من استوت ترضع طبيعي و تشرب حليب نان، وطبعا عقب مادشت السادس عطيتها نان 2 لين أحين، وما أحس انها يالسة تمتن أو تصحصح، بس اللهم يالسة تطول، كل الوزن يروح فالطووول

فاللي أبيه منكم يا خواتي ياغاليات..كل وحدة عندها بيبي تذكر نوع الحليب الصناعي اللي يشربه، وصحته، يعني ضعيف ولا مربرب...لاني احس انه نوع الحليب واايد يأثر في جسم الطفل..

طبعاً نحن مانبا نحسد العيال..الله يحميهم من العين..

يلااااااااااااااا....اتريا ردودكم

f

fay fay

عروس برونزية

28-03-2007 | 01:20 PM

هلا اختي

انا كنت استخدم اي سته وعشرين قولد

ماكان الحليب يبقى في بطن بنتي على طول ترجعه
جربت لها سيميلاك وصج ناسبها الحمد لله

صحه بنتي زينه مب مربربه ولا ضعيفه

جربيه لبنتك وايد تمام هالحليب

موفقه والله يحفظها لك

F

FLoOoOoOoNA

عروس مبدعة

28-03-2007 | 01:26 PM

fay fay

مشكورة الغالية عالرد..والله يحفظ بنتج يارب...

بخصوص سيميلاك..هو بس نوع واحد، يعني مب مثل نان 1 و 2؟؟

ومشكورو مرة ثانية..

f

flowers_girl

عروس جديدة

28-03-2007 | 02:26 PM

السلام عليكم ..

أهلين اختي ..

بانسبه للحليب استخدم سيميلاك.. لكن بعد ماكملت سنه بديت اعطيها نيدو الاطفال ..

وصحه بنتي عاديه مومربربه .. بالعكس اذا مربربه فهذا دليل ان الحليب مو زين ينفخ

الطفل مو دون فائده ...

واذا تبين بنتك تتحرك .. عرضيها للشمس ترى فوائدها كثيره .. طبعا اللى اقصده شمس

الصبح واخر العصر .. لان فيها فيتامين ( د ) ..

اعرف وحده بنتها عمرها سنه ونصف ومامشت وعرضتها للشمس لمده اسبوعين وبدت

توقف .. والحمد الله ماكملت شهر الا ماشيه ..

بالتوفيق اختي ...

ا

ام سعيد77

عروس متألقة

28-03-2007 | 02:41 PM

السلام عليكم ورحمة الله وبركاته ..
الغالية فلونة ...انت تعطين بنتج اكلات غير الحليب ؟؟

o

ouafae 2025

عروس جديدة

28-03-2007 | 02:45 PM

ABI BAS OKHTI AGOLLIK INNI FI BA3D IL ATFAL ILLI B YIT2AKHARO FI LMACHY W FI NOT9 KAMAN.BAS NAW3IYAT IL7ALIB LAZIM DAROURI TCHOUFI TABIB MOKHTAS FI LATFAL W HOWA YCHOUF IN KAN WAZN TIFLATIK TABI3I WALLA BA3D LAZIMHA CHI.RABBINA YI7FADHA WYIJ3ALHA MNI SSALI7IN YA RAB...:)

ط

طيووف

عروس رائعة

28-03-2007 | 02:50 PM

مرحبااا غناتي

أن أعطي ولدي حليب سيميلاك ومرات أحط له في المرضعة

كم قطعة فارليز البسكوت والحمدالله صحته زينه ..

ل

لب لفواد

عروس ماسية

28-03-2007 | 02:55 PM

الغالية ما قلتيلنا أنتي تأكلين بنتج .........؟؟؟؟؟؟؟
وشو نوع الأكل الي تأكلينها أياه عشان نقدر نساعدج...............

s

smsm78

مشرفة سابقة

28-03-2007 | 04:51 PM

بنتج تقريبا قد بنتي

بس بنتج الحين المفروض تاكل تقريبا نفس انواع اكلج اكيج

يعني تاكل الهريس والعيش والاشياء الامهروسة والسمك كله عادي

طبعا اكيد الحليب مهم بعد

انا اعطي ولدي نان 2

f

fay fay

عروس برونزية

28-03-2007 | 04:53 PM

عزيزتي سيميلاك انواع

فيه لحديثين الولاده
وثاني الاخضر لين سته شهور
والاحمر اللي هو سيميلاك غين لفوق السته شهور
وعندك سيميلاك النوع الاخير لفوق السنه وفيه سيميلاك بالحديد

كلهم روعه

ع

عروس الدوحه

عروس ماسية

28-03-2007 | 05:29 PM

هلا اختي انا اعطي بنتي سيميلاك ادفانس اللي مغطاته ذهبي الجديد للرضع واشوفه اوكي معاها بس ماادري اذا مناسبها اشلون اعرف؟

هي تشربه بس لاحظت من كم اسبوع ترجع شوي من حليب وامي قالتلي عادي كل ياهل جذي وطلع لها شفتي اشلون حرار صغااار كلش ماينشافون الا لما تحطينها جدام الليت واذا حسست بيدي الاحظ في حرار على وجها كامل وصغااار ماادري من حليب والا صادتها حساسيه

من تبوس مع اني وقفت ابوسهااا

F

FLoOoOoOoNA

عروس مبدعة

28-03-2007 | 05:55 PM

flowers_girl

مشكورة الغالية عالرد....أنا معاج انه الحليب اللي ينفخ مامنه فايده...بس البنت واايد ضعيفة...طبعاً أنا ماباها تستوي دبدوبه مرة وحدة..بس أباها تصحصح شوي..وفكرة الشمس حلوة...انشالله تستفيد وتتحرك من مكانها

ام سعيد77..ولب الفواد
الغاليات...هي أعطيها وايد أشياء...عصاير طبيعية، عيش مهروس مع الخضار وتقريبا كل أكلات الأطفال المعروفة...

ouafae 2025
مشكورة عالمرور اختي...وديتها قبل شهر تقريبا عند الدكتور وقال وزنها وايد زين !!!

طيووف
هلا الغالية...يوم كانت أصغر..يعني مال 3 و 4 شهور عطيتها الفارليز,,بس ماشالله أحين تاكل تقريباً كل شي بس مايبين فيها...ومشكورة عالرد

روعة دبي

اتشرفت بمرورج بالموضوع ياروعة...ومثل ماقلت هي تاكل بس مايبين فيها...

fay fay

مشكورة الغالية عالتوضيح

عروس الدوحه

أكيييييد من البوس..لانه بنتي نفس الشي...من أبوسها على طول تطلع لها حبوب صغيرة ع ويهها...ومشكورة عالرد...

يعني أحين مافي علاقة بالحليب اللي استخدمة وصحة البنت؟؟؟ والله احترت...:sad: !!!!

ش

شيخة البيت

عروس مبدعة

28-03-2007 | 06:36 PM

شوفي الغاليه .. انا ابصراحه مشكلتي مثل مشكلتج ويمكن اشوي ازيد .. بنتي عمرها 4 شهور بتدخل الخمسه إنشاءالله ... مثل ما انتى اتقولين احس انها ضعيفه وما تتحرك وايد والمشكله انها ما تشرب حليب وايد تشرب اقل من سنها بوااااااااايد ... انا كوني بالغربه سرت العياده وسألتهم وشافو وزنها قالولي طول ما انه الوزن في السليم عادي اليهال يكون ضعيف اصلا احسن من المربرب وبعدين بخصوص الحركه كل ياهل يختلف عن الثاني اسمعيها مني عمرج لا اتقارنين ولدج بياهل ثاني ولا بأخوانه .. هذا إلي قالولي ... وبعدين كتبولي على حليب وايد زين في الأمارات ما عدنا غير في سبنس ومب مال كل العمر ,,, هاي المشكله يوم يت البلاد اتغربلت بس والله هذا الحليب صدق زين والكل نصحني فيه من الأطباء ... اسمه SMA GOLD >>>> اتمنى اني افدج ول اتحاتين كل بوقته حلو ..

ج

جمـــانة

مشرفة سابقة

28-03-2007 | 06:47 PM

هلا جربت سيميلاك بولدي وكان مخلوط مع الرضاعة الطبيعية
والحمدلله صحته كانت زينة ووزنه عمره ما نقص وهم دمه...

بس اخته صحتها ووزنها افضل بوايد لأن السبب اعتقد انها ترضع طبيعي خالص بدون اضافة الصناعي :)

a

alfajer _alb3ed

عروس مبدعة

28-03-2007 | 07:05 PM

من افضل الانواع عندج اس 26 وسيميلاك...

ر

روزان احمد

عروس رائعة

28-03-2007 | 07:33 PM

اما انا ..بنتي كملت الشهر الرابع قبل ستة ايام
واعطيها حليب كيكوز 1 من منتجات نستله وهو النوع الاكثر استخداما في عموم العراق
والحمد لله صحتها زينة

ت

تسبيحات

مشرفة سابقة

29-03-2007 | 12:00 AM

الله يحفظ لك بنوتك واولاد المسلمين
نان ابد مارتاحله
لكن عندك سميلاك ادفانس من يوم /ستة اشهر
سميلاك غين الى سنه ونصف
ثم عين بلص
والحمد لله مرتاح عليه ولدي

غ

غدران

عروس مشرقة

29-03-2007 | 12:58 AM

انا بنتي غير الحليب الحيواني ماطاح عليها وسبب لها حساسيه
وديتها العياده والدكتور كتب لها ايسوميل1 (لا يحتوي على الحليب خالي من اللاكتوز..مزود ببروتين فول الصويا)

والحمدلله صحتها زينه وهي بعافيه فديتها

Q

Qtr Girl

عروس ماسية

29-03-2007 | 10:32 AM

ولدي عمره الحين 3 شهور

من جبته وان اعطيه حليب نان 1

وماشالله ماشي معاه ماسبب له أي مشكلة

وماشالله ماشالله ولدي مربرب وبعافيه بس في حدود الوزن الطبيعي مب اكثر

اول ماجبته كان 2 كيلو و800 جرام ويوم خلص شهر كان وزنة 4 كيلو ونص ماشالله تبارك الرحمن

(f)

F

FLoOoOoOoNA

عروس مبدعة

29-03-2007 | 11:05 AM

شيخة البيت
هلا الغالية، هي صحتها الحمدالله أوكي...بس صدقج لازم ماأقارن..بس اتعرفين أهل الريل..كله يقولون ضعيفة اتعقدت ووايد يقارنون بينها وبين باقي العيال...الله يعين...ومشكورة عالافادة..

جمانه..
هلا والله بمشرفتنا...مشكورة الغالية عالرد...بنتي قبل شهرين كانت نسبة الحليب الصناعي اللبي تشربه شويه لاني من أرد من الدوام أرضعها طبيعي...افهالشهرين الاخيرين زادت الرضعات الصناعية...بس هي من بونها ضعيفه لافادها الصناعي ولا الطبيعي..رشيقة طالعة على أمها :shy:

alfajer _alb3ed

مشكورة الغالية عالمرور والرد

روزان احمد..

مشكورة عالرد...والله يفرج عليكم فالعراق ويحفظ عيالكم من جور الاحتلال ياااااارب

دمعة الظلام

هلا بدمعة...ماشالله اشوف الاغلبية يمدحون سيميلاك...شكلي بستخدمه...ومشكورة عالمرور

غدران

مشكورة الغالية عالرد...عاد بنتج سالفتها سالفه..الله يخليها لج يارب..

Qtr Girl
مشكورة الغالية عالمرور و الرد...