روابط قد تهمك :
فساتين العروس | تسريحات | تنظيم الاعراس | زخرفة | عالم حواء


صفحة 1 من 14 1234567891011 ... الأخيرةالأخيرة
النتائج 1 إلى 15 من 202

الموضوع: طريقتي في تقسيم و صرف المهر أتمنى تفيدكم

  1. #1
    مشرفة سابقة الصورة الرمزية دوحانية
    تاريخ التسجيل
    18/04/2005
    الدولة
    الجنة بإذن الله
    المشاركات
    4,913

    طريقتي في تقسيم و صرف المهر أتمنى تفيدكم

    السلام عليكم ورحمة الله وبركاته

    هذا أول موضوع لي في القسم بعيد عن الإستفسارات ... الخ

    موضوعي سلمكم الله عن " ( المهر )" و كيف تقسمينه و توزعينه بحيث إنك تصرفينه بشكل ما يقصر عليكي و الله يبارك لكم في مهوركم ..
    و على فكرة هذي طريقتنا إحنا بنات العايلة وانا الحين أتبعها و بصراحة مجدية .. بس قبل خلوني أقص عليكم هالقصة وعقب بابتدي بشرح الطريقة ..
    ...

    في شهر 7 اللي فات قررنا نروح دبي سياحة وفرصة لي أشتري لي بعض الاغراض للعرس , فأخذت معاي 5 الاف كاش لأي شي باشتريه للعرس بس .

    و أخذت معي دفتر , و ظروف الرسايل .. حطيت الفلوس في ظرف أعزلهم عن مصروفي الخاص , وصرت كل ماخذت شي احتفظت بالفاتورة في نفس الكيس و الدفع يكون من الموجود في الظرف حتى الباقي " الخردة " أرجعها في نفس الظرف ما أخليها برى ..
    ولما أرجع الشقة خذت الدفتر وقسمته بحسب الأغراض الموجودة عندي :
    قمصان النوم - العبايات - القماش - العود و البخور ... الخ

    و بديت اسجل كل شي أخذته مع سعره بجنبه و أحتفظ بالفاتورة في ظرف ثاني مكتوب عليه " الفواتير " , و هكذا في كل مرة أطلع فيها للسوق .. و حتى العرابين المدفوعة أسجل مثلاً
    عباية 800 ريال - المدفوع : 300 - الباقي :500 و أعزل هالمبلغ لحاله في ظرف مكتوب عليه " العرابين أو المتبقيات "

    و الحمد لله الـ5 آلاف اللي خذتها معاي كفتني وجابت لي أشيا كثيرة , و سحبت 5 الآف غيرها وبنفس الطريقة بس هالمرة انتبه إن ماعندي غير هالـ 5 أتصرف فيها ..

    وهكذا رجعت البلاد محملة بأغراض مختلفة بـ10 الآف و بها خلصت أشيا من المفروض علي آخذها أو اللي ممكن إني ما ألقاها في الدوحة ..

    و الله يا بنات إن هذي الطريقة مجدية جداً وانا ما زلت أتبعها من بعد ما رجعت للدوحة .. : )
    ..

    نبتدي الحين في شرح الطريقة للي مهرها معاها او حتى للي مهرها موجود في البنك :

    خلي معاكي دايماً :
    دفتر صغير في شنطة اليد + قلم + آلة حاسبة .
    في البيت لازم يكون عندك :
    دفتر عادي + ظروف أو مظاريف

    نبتدي :
    سجلي في ورقة خارجية كل الأغراض اللي تبغين تاخذينها و الأشيا المطلوبة منك وهنا أقصد الحجوزات .. يعني عندنا فئتين كبار " المشتريات " + " الحجوزات " .

    سجلتي ؟

    حلو .. الحين قسمي الدفتر للمشتريات : ملابس سبورات - ذهب - عبايات - عود و بخور و عطورات ... هكذا

    إذا قسمتي , انتقلي للخطوة اللي بعدها ..

    بعد كذا كتبي عنوان كبير " الحجوزات " و اللي هي على سبيل المثال :

    الكوشة - تجهيز الطاولات - الشعر - المكياج - الحنا - الحف " الحلاوة " - التصوير ... الخ

    حددي لكل شي مبلغ معين و التزمي به << شرط ضروري عشان ماتضيعين الفلوس ..

    الحاجات الكبيرة اللي تحت بند الحجوزات ارفعي المبالغ الخاصة بها :

    - الظرف الأول : الكوشة - 8000 ريال
    - الظرف الثاني : التصوير - 3000 ريال
    - الظرف الثالث : الشعر والمكياج - 3000 ريال
    - الظرف الرابع : الحنا : 700 ريال .
    - الظرف الخامس : الفستان ( تحددين إيجار - تفصيل - مشترى ) و مهما كان لازم تحطين مبلغ معين له : 10 الآف ريال .

    نفس التقسيم اتبعيه مع كل جهازك , وهذا موضوع مشرفتنا أم عادل جزاها الله خير ممكن يساعدك في التقسيمات الكبيرة و تعرفين أنتي محتاجة لشنو :

    موسوعة جهاز العروس من الألف إلى الياء وبالصور

    ...

    المطلوب منك عزيزتي إنك لما تروحين السوق تشترين لازم تعرفين روحتك للسوق هذي بغرض إيش ؟ بتاخذين ملابس ؟ قمصان نوم ؟ مفارش ؟ ولا شنو ؟؟
    لما تحددين بتعرفين أي ظرف من المظاريف راح تاخذين معاكي وحاسبي ما تصرفين من المبلغ المخصص لحاجة معينة في شي ثاني ..

    ...

    الحين انتي في السوق و بتاخذين لك ملابس سبورات :
    بيكون عندك ظرف فيه مبلغ مُقدّر للسبورات , دخلتي المحل اخذتي اللي عجبك تجين للكاشير تدفعين من الظرف الموجود , و ترجعين الباقي في نفس الظرف وتحتفظين بالفاتورة , المحل ما يتعامل مع الفواتير على طول اول ماتطلعين تسجلين في الدفتر الصغير اللي شريتيه مثلاً ( ملابس = 200 ريال ) .. و نفس الشي يمشي مع كل أغراضك ..

    ...

    رجعتي البيت " الحمد لله على السلامة "
    تدونين كل شي اشتريتيه - حتى بالوصف لو تقدرين - مع السعر .. وتحت البند المخصص ..

    ...

    بالنسبة للحجوزات نفس الطريقة المتبعة : اللي تدفعين له عربون اكتبي ( العربون = .... , المتبقي = ... ) و اللي تدفعين له كامل اكتبي ( تم تسليم المبلغ كاملاً )

    ...

    ملاحظات :

    1- بالنسبة للحجوزات : إذا خصصتي مبلغ معين وليكن 8000 الآف للكوشة , ورحتي ولقيتي كوشة عجبتك بـ 7000 لا تترددين و وفري 1000 حطيها في شي ثاني ينفعك ..

    2- طول ما أنتي تتجهزين راح تصيرين مثل الكاش ماشين دفع دفع لكن حطي في بالك ما يكون الدفع في حاجة أنتي في غنى عنها أو حاجة للمستقبل البعيد .

    3- بين الفترة والثانية حاولي تحسبين بالآلة الحاسبة أنتي شقد صرفتي لحد الحين على بند معين ؟ وشكثر يتبقى لك .. هالطريقة بتخليكي تعرفين اللي لك و اللي عليك ..

    4- الأسعار المذكورة لمجرد التقريب و للمثال مو شرط الإلتزام بها في الأخير مهرك مختلف عن مهري وعن مهر غيري ..

    5- لا تصرفين على الملابس و هالأغراض كثر ما تصرفين على جسمك وشعرك .. لأنهم الأهم فاستغلي المبلغ في إنك تسوين لك كورسات علاج للشعر أو معالجة البشرة أو تشتركين في نادي للتخسيس .

    6- بالنسبة للفستان : أنتي تحددين في البداية هل بيكون تفصيل ولا جاهز ولا إيجار , و لما تحددين تحطين مبلغ بس لازم تحطين مبلغ أكثر بقليل مثلاً قلتي إيجار ما لقيتي بتضطرين تفصلين أو تشترين يمكن يكون أغلى فحطي حسابك من البداية بس مثلاً ما توصلينه لمبلغ خيالي و تخربين كل شي و تقصرين على نفسج .. وتقولين دوحانية قالت !!!
    ...

    هذي طريقتي بالموجز و إذا تحبون التفاصيل ما عندي مانع ^^

    نلقاكم على خير .. و الله يطرح البركة في مهوركم إن شاء الله ... لا تنسوني من دعائكم في ظهر الغيب : )

    أختكم / دوحانية

    ...

    ملاحظة للأخوات المشرفات : إذا الموضوع المفروض يكون في مكان ثاني يا ليت تخبروني بالنقل , وجزاكم الله خير ..

  2. #2
    عروس نشيطة
    تاريخ التسجيل
    24/04/2005
    الدولة
    هنا
    المشاركات
    150
    مشكوره اختي عل موضوع...مره استفدت منه لانو انا في بدايه جهازي..و بنفس طريقتك معايا دفتر و قلم على طول بالشنطه

  3. #3
    عروس مشاركة الصورة الرمزية ريم الاريوم
    تاريخ التسجيل
    13/05/2004
    الدولة
    الامارات
    المشاركات
    55
    مشكوره اختي على هالموضوع

    وبستفيد منه في جهاز أختي

  4. #4
    عروس متألقة الصورة الرمزية محبة البراءه
    تاريخ التسجيل
    23/06/2005
    الدولة
    القلوب البريئه
    المشاركات
    251
    الله يعطيج العافيه عزيزتى
    على هالطريقه
    جزاج الله خير عليها
    اختج حنونه المزيونة

  5. #5
    مشرفة سابقة الصورة الرمزية PrINcEss
    تاريخ التسجيل
    09/11/2004
    الدولة
    السعوديه
    المشاركات
    3,546
    تسلمي على هالموضوع المفيد

    مشكوره ماقصرتي

  6. #6
    عروس مشرقة
    تاريخ التسجيل
    19/01/2005
    الدولة
    قطر
    المشاركات
    470
    مشكوره دوحانية صج طريقتج وااايد حلوه ونافعه
    ان شاء الله بطبقها اذا بديت اجهز

  7. #7
    عروس فضية
    تاريخ التسجيل
    10/06/2005
    الدولة
    بين اهلي واحبابي ^__^
    المشاركات
    2,283
    تسلمين يا قمر
    والله ما قصرتي
    والله يطرح البركة في مهرج وفي كل خطوة تاخذينها
    اختج
    نعو و و مة

  8. #8
    مشرفة سابقة الصورة الرمزية &&_عاشقة الجوري_&&
    تاريخ التسجيل
    23/05/2005
    الدولة
    &&__ في جنة النعيم باذن الله __&&
    المشاركات
    2,829
    مشكوره عيوني بحط فكرتك في بالي
    لحد مايجي النصيب

  9. #9
    عروس نشيطة
    تاريخ التسجيل
    15/06/2003
    الدولة
    دار زااااااااايد
    المشاركات
    171
    عزيزتي الدوحانية

    موضوعج وااايد حلو وطريقة التقسيم المهر وكتابة كل التفاصيل طرقة ناجحة عشان ما تنسين شيء من الأغراض وفي نفس الشيء المهر يكفيج.

    لكن حبيبتي بغيت انوه لشغلة مهم إلي هي سالفة انج تاخذين مبالغ كبيرة وياج للبيت وداخل ظروف، ترى واايد عرائس تعرضوا للسرقة من خدامتهم من البيت.

    فأتمنى من الخوات ان يكونن حريصات وهو محتفظات بالمبالغ عشان ما نقعد ندم ونعوض الخسارة.

    وشكراااااااااا

  10. #10
    عروس متألقة الصورة الرمزية بنت جميرا 6
    تاريخ التسجيل
    17/12/2004
    الدولة
    الامارات
    المشاركات
    272
    تسلمين الغاليه

    يزاج الله الف خير

  11. #11
    مشرفة سابقة الصورة الرمزية دوحانية
    تاريخ التسجيل
    18/04/2005
    الدولة
    الجنة بإذن الله
    المشاركات
    4,913
    hebaaa
    العفو يا قلبي ,, و إن شاء الله تتهنين في مهرج و الله يتمم عليج ..

  12. #12
    مشرفة سابقة الصورة الرمزية دوحانية
    تاريخ التسجيل
    18/04/2005
    الدولة
    الجنة بإذن الله
    المشاركات
    4,913
    ريم الأريوم

    العفو يا قلبي , والله يتمم لأختج على خير ..

  13. #13
    مشرفة سابقة الصورة الرمزية دوحانية
    تاريخ التسجيل
    18/04/2005
    الدولة
    الجنة بإذن الله
    المشاركات
    4,913
    حنونة المزيونة

    الله يعافيج , و يجزيج بالمثل إن شاء الله ..

    شكراً للمرور ..

  14. #14
    مشرفة سابقة الصورة الرمزية دوحانية
    تاريخ التسجيل
    18/04/2005
    الدولة
    الجنة بإذن الله
    المشاركات
    4,913
    عبير الورد

    العفو والله يسلمك حبيبتي ..

  15. #15
    مشرفة سابقة الصورة الرمزية دوحانية
    تاريخ التسجيل
    18/04/2005
    الدولة
    الجنة بإذن الله
    المشاركات
    4,913
    نبع الكوثر

    هلا بج يالغالية ,, و إن شاء الله تنفعج هالطريقة ..

صفحة 1 من 14 1234567891011 ... الأخيرةالأخيرة